Kubanjwe isine kwityala lokutshiswa kwababini basetyhini!
Kubanjwe abarhanelwa abane kwityala lokufunyanwa kwabasetyhini ababini betshiswe babhubha.
Image: Umfanekiso ogciniweyo
Amapolisa akuqinisekisile ukubanjwa kwabarhanelwa abane, kwityala lokubulawa kwabasetyhini ababini ngoLwesithathu, umhla we18 kule nyanga, eKhayelitsha, kwaNobuhle.
Oku kulandela ukufunyanwa kwemizimba emibini itshisiwe, kwihlathi eliseKhayelitsha, kwaNobuhle, ngoLwesithathu. Ukanti le mizimba yamaxhoba iqikelelwa phakathi kweminyaka eli17 kunye ne19.
Ngokwengxelo yesithethi samapolisa uBrigadier Nobuntu Gantana, aba barhanelwa bane, nabaphakathi kweminyaka eli16 ukuya kuma23, babanjwe ngoLwesine, umhla we19 kule nyanga, kwaNobuhle. Oku kubanjwa kunxulumene ngqo nophando oluqhubekayo lokubulawa kwabasetyhini ababini.
UMkomishinala obambeleyo wamaPolisa kwiphondo leMpuma Koloni, uMajor General Thandiswa Kupiso, uncome umsebenzi wamapolisa.
"Ukubanjwa ngokukhawuleza kwaba barhanelwa ziziphumo zokuzinikela kwamapolisa emsebenzini wawo, nentsebenziswano nabahlali. Siyaluqinisekisa uluntu ukuba eli tyala liza kufumana ingqwalasela kangangoko," utshilo uMajor General Kupiso.
UMphathiswa weSebe lezeMfundo eMpuma Koloni, uFundile Gade, usigxekile esi senzo simanyumnyezi watsho evakalisa intlungu yakhe ngokubhubha kwabafundi ababini besikolo samabanga aphakamileyo iNkululeko Secondary School kwaNobuhle.
Esi sehlo kuthiwa senzeke ngexesha lokubhiyozelwa koSuku loLutsha. UGade uthe ukhuseleko nentlalontle yabafundi babo yeyona nto iphambili kubo. "Sikhathazeke kakhulu lulwaphulomthetho olumanyumnyezi olwenziwe kumantombazana ethu amabini esikolo eKariega. Imihla ngemihla ndikholelwa ukuba kukho imfazwe ejoliswe kubasetyhini kunye namantombazana amancinci. Sivelana neentsapho, oogxa babo kunye noluntu lwaseKariega," utshilo uGade.
ISebe likwaqinisekisile ukuba liza kubonelela ngenkxaso kwiintsapho ezichaphazelekayo.
Uphando kunobangela onokuba ukhokelele kwesi senzo luyaqhuba. Iinkcukacha malunga nabarhanelwa kwakunye namatyala ababekwa wona akuphinde adandalaziswe, nanjengoko inkqubo yomthetho isaqhuba.
Amapolisa acela nabani na onokuba neenkcukacha malunga neli tyala ukuba eze ngaphambili, ukuncedisana nolu phando.