UMongameli uCyril Ramaphosa uvakalise amazwi ovelwano kulandela ukubhubha ngokungenalusini kukaPamela Mabini obelitshantliziyo elaziwayo laseGqeberha. UMabini, 46, wadutyulwa wabhubha ngaphandle kwekhaya lakhe ngoLwesihlanu, umhla wesixhenxe kweyoKwindla 2025, nto leyo ebangele umsindo kubantu abamemelela ubulungisa.

UMabini ebesaziwa ngokuzimisela kwakhe ekuthetheleleni amaxhoba obundlobongela obusekelwe kwisini, edlala indima ebalulekileyo kwityala likaTimothy Omotoso apho lo mfundisi waseNigeria etyholwa ngokudlwengula nokuthubelezisa ngabantu.

Ngenxa yegalelo lakhe, uMongameli Ramaphosa uncome uMabini ngobugorha nokuzinikela kwakhe, esithi, "UMabini wenze yaluxanduva lwakhe ukuqinisekisa ukuba amapolisa neenkundla zethu zenza abenzi bobubi bajongane nengalo yomthetho."

Uyibethelele into yokuba ukubulawa kwakhe ngokungenalusini kubonisa into ebuhlungu—yokuba izaphuli mthetho ezinobundlobongela azibonisi ntlonipho kubomi babemi boMzantsi Afrika, ingakumbi abo banjengoMabini, abakhonza uluntu ngokuzinikela.

Eqaqambisa idabi eliqhubayo lokulwa nobundlobongela, uRamaphosa ubongoze uluntu ukuba lumanyane kwaye lusebenzisane nabezomthetho ukulwa ulwaphulomthetho olulolu hlobo: "Ukubhubha kwamaxhoba obundlobongela kufuneka kushukumise uluntu ukuba lusebenzisane ngokusondeleleneyo njengabemi kunye nentsebenziswano namapolisa ukunqanda ubundlobongela nokuchonga abenzi bobubi."

Umbutho wamanina weANC (ANCWL) eMpuma Koloni nawo unike imbeko kuMabini, lo mbutho umothulela umnqwazi [uMabini] njengetshantliziyo elizinikeleyo kwidabi lokulwa ubundlobongela obusekelwe kwisini. Kwingxelo, babonakalise ukuzibophelela kwakhe ekuphakamiseni amalungelo abasetyhini kunye nentlalontle jikelele yoluntu lwakhe.

"Ebengumntu ophayo eluntwini kwaye ebeqhubeka nobomi bakhe ethethelela iimfuno zamakhosikazi noluntu," itshilo iANCWL ibhekisa kwigalelo lakhe elibalulekileyo kwityala likaOmotoso.

I-ANCWL imemelele ukuba amapolisa athathe amanyathelo akhawulezileyo ukuze kubanjwe ababulali bakaMabini. "Simemelela ukuba kubanjwe kwaye kugwetywe bonke abenzi bobubi nababulali," bongeze ngelitshoyo, babethelele ukuzinikela kwabo ekulweleni ubulungisa kungekuphela nje kulo mba kaMabini kodwa bonke abasetyhini abachatshazelwe bubundlobongela.

Njengoko uMzantsi Afrika udandathekile kukubhubha kukaMabini, ilifa lakhe njengentshatsheli yamalungelo abasetyhini kunye nomntu obesilwa nobundlobongela obusekelwe kwisini, ngokungathandabuzekiyo izenzo zakhe ziyakukhuthaza abaninzi ukuba baqhubele phambili idabi lakhe lobulungisa nokhuseleko.

#ancwl

URamaphosa unika imbeko kwitshantliziyo elingasekhoyo