Xa ndandithatha isigqibo sokuzimanya neqela elalizakusungula iphephandaba I'solezwe lesiXhosa kweli leMpuma Koloni sisuka eKapa abanye bethu sikhokelwe ngu-Unathi Kondile, ndandizaliswe ziintandabuzo. Njengendoda etshatileyo, akuzange kubelula ukufika kwisigqibo sokushiya umsebenzi kuMasipala wesixeko saseKapa ndisiza kuba yinxalenye yephephandaba elisaqalwayo, elingaziwayo apho liza kuphelela khona.
Ndingatsho ndithi umsunguli walo mbono wokuvula eli phephandaba I'solezwe lesiXhosa, u-Unathi Kondile, wayengazithumanga koko wayethunywe yimimoya yabo babesilwela ukubhalwa kweendaba ngolwimi lesiXhosa eMzantsi Afrika.
Uninzi lwala madoda sele abhubha kudala, kodwa liyabonakala idabi labo kwimisebenzi ethe yenziwa ziintombi noonyana babantu ababebhala kweli phephandaba ukusukela oko lasungulwayo. Ukugqiba iminyaka elishumi limile I'solezwe lesiXhosa bubungqina bokuba ngenene nguThixo yedwa owazi ikamva nesigqibo sekamva. Iphephandaba I'solezwe lesiXhosa lindinike ithuba ebendingenakulinikwa nangutata ondizalayo.
Uninzi lwamaphephendaba ayekhe azanywa kwiminyaka engaphambili awazange ahlale ixesha elingangeminyaka elishumi eqhuba, ambalwa afikileyo kulo minyaka. Kuthwa ebevalwa ngenxa yokuba ebenyanzelwa ukuba abhale iindaba ngohlobo oluhambelana nenkolo ethile, izimvo zopolitiko ezithile okanye enye into ethandisa lowo unemali. Amava endiwafumene ngenxa yokusebenza kweli phephandaba ayeliphupha elikude elalingenakufikeleleka, kodwa ukuzalwa kweSolezwe lesiXhosa kwenza ukuba elo phupha lizaliseke.
Ngenxa yokusebenza kwiphephandaba I'solezwe lesiXhosa ndikwazile ukuxhawula izandla ndincokola, ndiphunga ikofu nabantu endingazange ndicinge ukuba ndingafikelela kubo. Kubo ndingabalula uMama uZondeni Sobukwe obeyiNkosikazi kaNjingalwazi Mangaliso Sobukwe.
Ngaphandle kokuba iSolezwe landinika ithuba lokuncokola naye, kodwa ndakwazi ukusungula ubuhlobo nosapho lukatata uSobukwe, uDinilesizwe, uDedani nabanye bosapho. Kumhla sityelele ela khaya ndihamba nomfoti uMichael Pinyana, sanyanzeleka ukuba sophule umthetho wenkampani, sathwala umama uSobukwe ngemoto yenkampani ukusuka kwisibhedlele iMidlands eRhafu ukuya ekhayeni lakhe kumbindi wedolophu.
Ngenxa yethuba endalivulelwa liSolezwe lesiXhosa ndikwazile ukuya kufika kwingcwaba leKumkani uHintsa wamaXhosa (Aah! Zanzolo!) phezu komlambo iNqabarha. Ndiphathwa ziinyembezi xa ndicinga ukuba ukuze ndibone ingcwaba leKumkani yamaMpondo uMqikela kaFaku ePalmerton eLusikisiki ndandithunywe liSolezwe lesiXhosa.
I'solezwe lenza ukuba ndizibone ndijike ndangunyana kumaxhego ayesilwela inkululeko yeli phantsi kombutho wePAC, aquka ubawo uWaters Toboti, uMpolose Mangqangwana nobawo uNontente Kamteni. Andinakulibala ukuba ngenxa yeSolezwe lesiXhosa ndakwazi ukusungula ubuhlobo obuliqilima nenye yeengadluma zeeNkosi zesizwe sabaThembu uNkosi Ngangomhlaba Mathanzima.
Ukhothame sele eluthathele kuye uxanduvo lokundibizela kwimicimbi yabaThembu equka ukubekwa kweeNkosi, izikhumbuzo kwakunye nemibhiyozo yesasizwe. Ukuba bendingelilo iyilo ngebandithi I'solezwe lesiXhosa ligalele kwacaca kuvimba wolwazi namava endinawo ngoku.
Kulo ndithi halala!!!!!!