Unogada obhinqileyo ufunyenwe ehamba ze neembumbulu ezimbini entloko eBityi

Amapolisa aseBityi aphanda ngetyala loonogada basetyhini ababini abaxhwilwa besemsebenzini kwikliniki yaseXhwili baza badutyulwa – omnye wabhaqwa ehamba ze enamanxeba eembumbulu entloko, logama omnye esilwela ubomi bakhe esibhedlele sithetha nje.

Esi sehlo senzeke ngobusuku bangeCawe ngo23:50, umhla wesibini kweyeDwarha 2025, kwikliniki yaseXhwili. Amapolisa acela nabani na onolwazi olunokunceda ekufumaneni abenzi bobubi.

Unogada obhubhileyo uneminyaka engamashumi amabini anesibhozo (28) ubudala, logama ugxa wakhe oye wasinda nolwela ubomi bakhe esibhedlele unamashumi amane anesibhozo (48) ubudala.

Isithethi samapolisa uKapteni Welile Matyolo uthe iinkcukacha ezifunyenwe ngamapolisa ziqinisekisa ukuba oonogada babini basetyhini baxhwilwe kwigumbi ababesebenzela kulo baza badutyulwa ngasemva kwekliniki kwibala elivulekileyo.

"Umzimba kamfi ufunyenwe ukhululwe iimpahla unamanxeba amabini eembumbulu entloko ngelixa ugxa wakhe ebebalekiselwe esibhedlele. Ityala lokubulala, ukuzama ukubulala nelokudlwengula livuliwe kwisikhululo samapolisa eBityi," utshilo uMatyolo.

Nabani na onolwazi olunokukhokelela ekubanjweni nasekutshutshisweni kwabarhanelwa ngempumelelo makaqhagamshelane neNtloko yabacuphi baseBityi, Detective Warrant Officer Mlilo ku083 688 6571 okanye iCrime Stop Number ku08600 10111 okanye aqhagamshelane nesikhululo samapolisa esikufutshane.