Ukhonjwe emnyango omoshe iR100-million yeArhente yophuhliso (ECDC) eMpuma Koloni

Ingqonyela yeArhente ekuthiwa yiEastern Cape Development Corporation (ECDC), uAyanda Wakaba, ikhonjwe emnyango emva kokuba ingasebenzisanga kakuhle imali elikhulu lezigidi zerandi (R100-million) kutshanje.

Oku kwenzeke emva kophando olunzulu olwenziwe yinkampani yamagqwetha ekuthiwa yiGBInc Attirneys. Ingxelo ithi abaphathi bayo iECDC bagqiba kwelokuba batyeshele umgaqonkqubo owamiselwa lisebe lezezimali osetyenziswayo kwimali kaRhulumente.

Oku kwenzeke ngexesha elibi kukho inqwaba yamashishini adinga inkxaso. Umbutho ophikisayo kwindlu yoWisomthetho eMpuma Koloni, iDemocratic Alliance (DA), ukwamkele ukugxothwa kukaWakaba - kodwa wavakalisa ukuxhalaba okunzulu ngokuqhwalela kolawulo olubonakalayo kwiArhente kaRhulumente.

"Ukungabikho kwendlela ecacileyo yokulawula imali ngaphakathi nokutyeshelwa komthetho kuyasikhathaza. Siza kunyanzelisa ukubona indlela ecacileyo eza kusetyenziswa ngayo imali kaRhulumente," itshilo ingxelo ekhutshwe yiDemocratic Alliance kutshanje. Yinto eqhelekileyo ukulawulwa gwenxa kwemali kwiECDC.

Ukungaphathwa kakuhle kwemali kuchazwe yiDA njengento eyingozi ngoba kungabangela ukuba angakwazi ukuyifumana ikxaso amashishini amancinci futhi nabasebenzayo bangayifumani imivuzi yabo.

Ithembise ngokuphosa isicelo kuMphathiswa wezoqoqosho ephondweni, uNonkqubela Pieters, esifuna ingcaciso malunga nendlela echithwe ngayo imali eyiR100-million. Iphondo leMpuma Koloni lisenengxaki enkulu yokunqaba kwemisebenzi ebangelwa kukudodobala koqoqosho.