Amadoda ngoku ayakwazi ukusebenzisa iifani zabafazi bawo
Ngoku amadoda angasebenzisa iifani zamakhosikazi awo, oku kuza emva kwesigwebo seNkundla yoMgaqo-siseko.
Image: iStock
Amadoda oMzantsi Afrika afuna ukusebenzisa iifani zamakhosikazi awo xa etshata ngoku angakwenza oko, oku kusemva kokuba iNkundla yoMgaqo-siseko yenze isigqibo sembali ngoLwesine ivumela oku.
Esi sigwebo siwiswe nguJaji Leona Theron eBloemfontein, eFreyistata.
INkundla yoMgaqo-siseko iye yabhengeza ukuba iCandelo lama26(1)(a) ukuya ku(c) lomthetho weBirths and Deaths Registration Act awuhambelani nomgaqo-siseko njengoko ucalula ngokungafanelekanga ngokwesini, ngokusilela ukunika amadoda ilungelo lokusebenzisa iifani zamakhosikazi awo xa etshatile.
Oku kuza emva kokuba izibini ezibini, uJana Jordaan kunye noHenry Van Der Merwe, uJess Donnelly-Bornman kunye noAndreas Nicolas Bornman, zicele umngeni kulo mthetho.
UVan Der Merwe wayalelwa igunya lokusebenzisa ifani yenkosikazi yakhe uJordaan waza uBornman wayalelwa ukudibanisa ifani yakhe nefani yenkosikazi yakhe.
Ezi zibini zawucela umngeni lo mthetho ngempumelelo kwiNkundla ePhakamileyo yaseFreyistata, nalapho ivakalise ukuba umthetho awuhambelani nomgaqo-siseko nokuba iSebe lezeKhaya livumele utshintsho. INkundla yoMgaqo-siseko ngoku isiqinisekisile isigwebo esinika amadoda afuna ukusebenzisa iifani zabafazi bawo ithuba lokwenza oko ngokusemthethweni.
Esi sigwebo sibonwa njengendlela yokubeka amadoda kunye nabasetyhini kwisikhundla esilinganayo somthetho emitshatweni.