Iindaba

URamaphosa umchaze njengomntu obesisicaka soluntu uMnu. Mabuza ongasekhoyo

Pedro Mapelo|Published

UMongameli uCyril Ramaphosa umkhaphe ngamazwi amnandi uMnu. David Mabuza ongcwatywe kwimpelaveki egqithileyo eMpumalanga.

Image: ANC/Facebook

UMongameli woMzantsi Afrika, uCyril Ramaphosa, umchaze owayelisekela lakhe, uMnu. uDavid Mabuza, njengomntu obesisicaka soluntu ngeentsuku zakhe zokuphila. Oku ukuthethe enkonzweni yokugqibela kaMnu. Mabuza ebibanjelwe eHoerskool Bergvlam, eMbombela, emini ngoMgqibelo odlulileyo.

Umngcwabo kaMabuza ubuzinyaswe ziinkokeli zikaRhulumente nezemibutho yezopolitiko ngokwahlukana kwayo noMnu. Thabo Mbeki owayenguMongameli ngaphambili. Ilizwe lathiwa wambu lilifu elimnyama ukusukela ngomhla wesithathu kule nyanga yeKhala emva kokubikwa kweendaba ezathi uMabuza uswelekile.

Waswelekela kwisibhedlela saseGauteng. Ithuba belilide engasabonakali phakati kwabantu ngenxa yempilo ebimane imkhathaza. Ebeneminyaka emininzi esebenzela uluntu. Waqala ukugqama kwiAfrican National Congress (ANC) akuba nguSihlalo wayo eMpumalanga.

Emva koko uye wakhokela iphondo phambi kokuba lisekela likaMongameli ukusukela ngonyaka ka2018 ukuya ngo2021. UMabuza wanconywa emva kokuba wakhetha ukuxhasa uRamaphosa kwinkomfa yeANC emva kokuphela kwexesha likaMnu. Jacob Zuma kwiANC nakwaRhulumente.

Ethetha esifihlweni ngempelaveki egqithileyo, uRamaphosa uthe: "UMabuza uya kuhlala ekhunjulwa njengesicaka soluntu esinembali engasoze icime kwezopolitiko." Abaninzi ephondweni lakhe bamchaze njengomntu obeluncedo futhi obengajiki entweni ayithethileyo.

"Ebengumntu othobekileyo. Indlela awakhuliswa ngayo yiyo ebimenza akubeke phambili ukufunqula abantu abangathathintweni. Ebengumntu othembekileyo owawenza kakuhle umsebenzi wakhe njengesekela lam kwiminyaka edlulileyo. Ngumntu owakhetha ukuhlala nabantu ukuze akwazi ukusabela izikhalo zabo," utshilo uMongameli.

URamaphosa noMabuza bakhokela ngexesha elibi kakhulu kukho ukuphixana okunzulu kwiAfrican National Congress eyade yaguzula iinkokeli zayo eziphezulu ngenxa yeengxaki zangaphakathi.

Zininzi neengxaki abajamelene nazo beselulawulweni eziquka ubhubhane ekuthiwa yiKhorona owasuba imiphefumlo emininzi yabantu wabhidliza neenkampani ezashiya abantu bengasebenzi. UMabuza usweleka iANC isengxakini enkulu yokulahlekelwa yinkxaso kulonyulo lukazwelonke lonyaka ophelileyo.