Uvele enkundleni owaphekela izalamane zomyeni amakhowa anetyhefu

UErin Patterson (50) utyholwa ngokubulala abazali bomyeni wakhe wangaphambili, uDon (70) noGail Patterson (70), kunye nodade kaGail, uHeather Wilkinson (66), kunye nokuzama ukubulala umyeni kaWilkinson, uIan (68), emva kokuba batye isidlo kwikhaya likaPatterson kweyeKhala ka2023.

Lo wasetyhini waseAustralia uye wathi akanatyala lokubulala. Uvele kwinkundla yaseAustralia ebutsheni bale veki kwaye angajongana neminyaka engama25 entolongweni ngesityholo sokuzama ukubulala, ngelixa ukubulala kwiphondo laseVictoria kuthwala isigwebo sobomi, ngokutsho kweCBS News.

Ngokweengxelo, uPatterson upheke ukutya okunenyama yenkomo eyaziwa ngokuba yiWellington, iitapile ezicujiweyo kunye neembotyi eziluhlaza kwikhaya lakhe elisemaphandleni eLeongartha ngomhla wama29 kweyeKhala ka2023. Zonke iindwendwe ezine zalaliswa esibhedlele ngosuku olulandelayo ngenxa yetyhefu evela kumakhowa, nawaziwa ngokuba yiamanita phalloides, nadityaniswa kwisidlo senyama yenkomo. UIan Wilkinson wasinda emva koqhaqho-fakelo lwesibindi.

Umtshutshisi uthe uPatterson ufake ngamabomu amakhowa anetyhefu ekutyeni, kodwa igqwetha lakhe lithi yingozi, ngokutsho kweBBC News.

UPatterson udize enkundleni ukuba wayeziva ingathi ubudlelwane bakhe nosapho lomyeni wakhe wangaphambili alusafani nakuqala njengoko bebengasabonani. Uphinde wachaza indlela yena nomyeni wakhe wangaphambili uSimon ababehlukene kodwa besatshatile ngokusemthethweni nendlela awayebonakala ingathi uyamkhupha kusapho lwakhe.

"Ndandinexhala lokuba uSimon wayengasafuni ndibandakanyeke kakhulu kusapho lwakhe," utshilo enkundleni. 

Eli tyala nelisele liqhube iiveki ezintandathu liqulunqwe ngabantu abali14 abaza kuthatha isigqibo sokuba uPatterson unetyala okanye akunjalo.