Kubanjwe abane ngokubulawa kwababini basetyhini eGqeberha

Intsebenziswano ekhokelwe ngamapolisa kwicandelo leNelson Mandela District Detective Intervention Task neSAPS Operation Bamba, ikhokelele ekubanjweni kwabarhanelwa abane, nabayanyaniswa nokubulawa kwababini basetyhini eSakhasonke, eWalmer, eGqeberha.

Ngokwengxelo yesithethi samapolisa uCaptain Sandra Janse Van Rensburg, esi sehlo senzeke ngobusuku bangoLwesine, umhla wokuqala kule nyanga kaCanzibe, malunga necala emva kwentsimbi yesibhozo ngokuhlwa, ngethuba amapolisa esabela ingxelo yokuvakala kwezithonga zompu.

Ekufikeni kwawo amapolisa, afumene imizimba yabasetyhini ababini, nabaphakathi kweminyaka eyi19 ukuya kuma40, inamanxeba aliqela okudukutyulwa.

Ingxelo iqhuba ithi, ngethuba amapolisa ephonononga indawo yesehlo, afumene okukhokelele amapolisa ukuba anabise uphando lwawo kwizibhedlele ezifutshane. EDora Nginza, athe abamba umrhanelwa obefumana unyango kumonzakalo osemlenzeni, nekuthe kamva wayanyaniswa nezehlo zokubulawa eWalmer.

UCaptain Janse Van Rensburg uqhube wathi, uphando oluye lwaqutyhwa luphinde lakhokelela amapolisa kumzi othile eGreenshields Park, nalapho kubanjwe abanye abarhanelwa abathathu. Ngethuba kuqhutywa ugqogqo, amapolisa athe athimba umpu wohlobo lweMossberg 12-gauge, kunye nebhokisi yeembumbulu zompu wohlobo lwe9mm.

Ukanti azikaziwa izizathu ezikhokelele kwesi senzo, kwaye kusaqhutywa nophando.

Abarhanelwa, nabaphakathi kweminyaka engama28 ukuya kuma46, bajongene namatyala okubulala, iyelenqe lokubulala, nokuba nompu neembumbulu enzingenamaphepha asemthethweni.

Kulindeleke abarhanelwa bavele ngoMvulo, umhla we5 kuCanzibe, kwiNkundla kaMantyi yaseGqeberha.