Amabanjwa aza kuvunyelwa ukusebenzisa iikhompyutha eziseleni

Inkundla yomgaqosiseko igwebe ukuba amabanjwa angasebenzisa iikhompyutha zawo xa efunda eziseleni, ukuba angabafundi ababhalisiweyo kwaye iikhompyutha ezo azinasixhobo esiqhagamshela kwi-intanethi.

Inkundla yomgaqosiseko yenze esi sigwebo namhlanje, igwebe ngelithi umgaqonkqubo okhoyo weeNkonzo zoLuleko othintela izixhoba zobuchwephesha ezifana neekhompyutha neeLaptop kwizisele zentolongo akukho mthethweni kwaye wophula ilungelo lomgaqosiseko lokuqhubela phambili nemfundo.

Enikezela isigwebo, uJustice Steven Majiedt, uchaze ukuba ngawaphi amabanjwa avumelekileyo ukusebenzisa iikhompyutha kwizisele zawo, "Naliphi na ibanjwa elikwiziko loluleko, elibhaliswe kwiziko lemfundo ephakamileyo elaziwayo neliyidinga ngokwenene ikhompyutha kwizifundo zalo.

"Naliphi na ibanjwa elingumfundi, elibhalisele ikhosi elifuna ngokufanelekileyo ikhompyutha njengenxalenye yesinyanzelo sekhosi leyo, linelungelo lokusebenzisa ikhompyutha yalo ngaphandle kwesixhobo esiliqhagamshela kwi-intanethi kwisisele salo."

Esi sigwebo silandela isimangalo sebanjwa uMbalenhle Ntuli ngo2018. Wasa isebe enkundleni ngokumthintela ukuba afikelele kwiLaptop ukuze afunde.