Iindaba

Ibanjiwe indoda etyholwa ngokudlwengula isigulana esigula ngengqondo

Cwayita Nondula|Published

Ibanjiwe indoda etyholwa ngokudlwengula isigulana esiphazamiseke ngokwasengqondweni kwisibhedlele saseWhittlesea.

Image: File

Ibanjiwe indoda, 38, etyholwa ngokudlwengula isigulana, 34, esiphazamiseke ngokwasengqondweni kwindawo yokupaka iimoto esibhedlele ngeCawa, ngomhla wama27 kuTshazimpuzi 2025, eWhittlesea.

Oku kuthiwa kungqinwe ngumongikazi owayesemsebenzini ngentsimbi yeshumi elinanye ngentseni, esi siganeko kuthiwa senzeke kufutshane neteksi ebimile kule ndawo yokupaka iimoto.

Isithethi samapolisa uKapteni Yolisa Mgolodela uthi amapolisa aphendule ngokukhawuleza kwaye umrhanelwa ekuvakala ukuba usuka kwingingqi yaseTsitsikama uye wabanjwa.

Kuthiwa umrhanelwa uza kuvela okokuqala enkundleni kaMantyi eWhittlesea ngomhla wama29 kuTshazimpuzi 2025.

UMkomishinala weSithili uMajor General Rudolph Adolph usikhalimele esi senzo solwaphulomthetho singenalusini.