IBokleni Plaza , eneevenkile ezingamashumi amabini ananye, uza kwandiswa ngemali ezizigidi zerandi ezikumashumi asixhenxe anesithandathu (R76-m).
Image: Facebook
Ayisoze ifane nangaphambili idolophu yaseLibode. Oku kulandela isibhegezo esingokwandiswa kweBokleni Mall okuza kufunqula koqoqosho. Zizigidi zerandi ezingamashumi asixhenxe anesithandathu (R76-million) ezibekelwe umsebenzi oza kwenziwa yinkampani ekuthiwa yiAJ Property Group.
Ezi ziziqhamo zenkomfa yotyalomali yango2023 apho iinkokeli zaseNyandeni Local Municipality zacacisa khona koosomashishini iindawo ezinamathuba oshishino kwiidolophu ezifana neLibode neNgqeleni. Ingxelo ekhutshwe ngumasipala ithe iholo loluntu liza kususwa kwindawo elikuyo njengokuba kuza kwandiswa iBokleni Mall.
"Kuluvuyo ukwazisa uluNtu ukuba iLibode Bokleni Mall iza kwandiswa. Siyavuya ngoba umsebenzi oza kwenziwa uza kufunqula uqoqosho udale nemisebenzi. Isakhiwo esitsha siza kunceda abantu batsho bakwazi ukuthenga kwindawo ephucukileyo. Oku kwenzeka emva kwenkomfa yethu yotyalomali esasinayo ngo2023," itshilo ingxelo ebhaliweyo kamasipala.
Ukwandiswa kweBokleni Mall, eyakhiwa ngo2018, ziindaba ezimnandi ebantwini baseLibode ngoba yimisebenzi ekumakhulu amane ekulindeleke ivele ngethuba lolwakhiwo oluza kongeza kwiivenkile ezingamashumi amabini ananye ezikhoyo ngoku. Iqikelelwa kumakhulu anamashumi asibhozo (380) imisebenzi eza kudaleka emva kolwakhiwo.
Phakathi kweevenkile ezintsha eziza kuvulwa kukho uPower Fashion, OBC noKFC. Umasipala waseNyandeni uthe udibene nabantu nabo oosomashishini futhi baluxhasa ngokupheleleyo uphuhliso oluzayo. Emva kokuvulwa koMbhashe LG Mall eyakhiwe ngeR350-million, kwiveki ephelileyo eDutywa, inkokeli yephondo leMpuma Koloni, uMnu. Lubabalo Oscar Mabuyane, ithe urhulumente usebenza ngokuzimisela ukuze nazo iidolophu ezincinci zikwazi ukufumana amathuba kwezoqoqosho.
Utyalomali olwenziwe eLibode lulandela emva kwesibhengezo seGcuwa Mall eyakwakhiwa ngemali engaphezulu kwamakhulu amathathu ezigidi zerandi (R350-million) ekuqaleni kwenyanga ephelileyo.
Related Topics: