UMnu. Lubabalo Oscar Mabuyane nosodolophu, uMnu. Samkelo Janda, bavule ngokusesikweni iMbhashe LG Mall eneevekile ezingaphaya kwamashumi amathandathu izolo.
Image: Mbhashe Mall/Supplied
Enye yeedolophu ezincinci kwiphondo leMpuma Koloni ifunqukile emva kokuvulwa ngokusesikweni kweMbhashe LG Mall izolo ekuseni. Ulwakhiwo lodederhu lweevenkile ezingamashumi amathandathu anesithathu zenze umahluko omkhulu kubantu abatsha abafumene imisebenzi kwiivenkile ezifikayo eDutywa.
Inqwaba yabathengi abasoloko bebalekela kwiidolophu ezifana neGcuwa neMonti - ngoku izinto ziguqukile, baza kuthenga kufutshane ngoba ayisafani nakuqala iDutywa. Ukuguquka kwezinto kungqinwe yinyambalala yabantu abaxhage iNkokeli yephondo, uMnu. Lubabalo Oscar Mabuyane, ovule ngokusesikweni iMbhashe Mall emsithweni obungcotshilo ngentsasa yayizolo.
Phakathi kweendwendwe ezihloniphekileyo ezithe zazimasa umsitho bekukho uSodolophu, uMnu. Samkelo Janda, uNksz. uBabalwa Majavu nezinye iinkokeli zebhunga leMbhashe Local Municipality. Ukwakhiwa kweMbhashe LG Mall yiExemplar REItail ibambsene nosomashishini owaziwayo, uMnu. Livingstone Nogoduka, kuqhwatyelwe izandla ngabantu abaninzi.
Ethetha emsithweni, uMabuyane ukwamkele ngovuyo ukulwa kweMbhashe Mall watsho egxininisa ukuba uRhulumente wakhe uzimisele ukufunqula iidolophu ezinelali njengeDutywa. "Uphuhliso olwenzekileyo kugqamisa ukuzibophelela kwethu ekuvuseleleni uqoqosho kwiidolophu ezincinci nasekusondezeni abatyalizimali.
"Ukwanda kwamashishini kuza kuqinisa uqoqosho oluza kunceda umasipala akwazi ukuphucula indlela azisa ngayo iinkonzo eluNtwini. SinguRhulumente sizibophelele ekuvuleni amathuba oqoqosho kuzo zonke iindawo," utshilo uMabuyane echwayitile.
Phakathi kweevenkile ezityale imali eDutywa kukho uShoprite, uBoxer, uPep, uStyle, uWimpy, uClicks, uSportscene, uFoschini, uHomechoice, OBC noPedros'. Okwenziwe eDutywa kubonisa ukukhula koqoqosho okuza kubeka uxinizelelo kumasipala ekufuneka asebenze ngakumbi.
Related Topics: