Amapolisa akhangela abarhanelwa ababulale isibini kuTsomo

Amapolisa akhangela abarhanelwa abathathu ababandakanyeka ekubulaweni ngokungenalusini kwesibini esitshatileyo kwikhaya labo ngoLwesine, umhla wama27 kweyoMdumba 2025.

Ngokwengxelo ephuma kwisithethi samapolisa uKapteni Namhla Mdleleni, amapolisa alunywe indlebe ngesi senzo malunga nentsimbi yesithandathu ngorhatya nalapho afika kwindawo yexhwayelo afumana izidumbu zendoda eneminyaka engamashumi amahlanu anesibhozo (58) nenkosikazi yayo enamashumi amathandathu anesine (64) zidunduluze kwichibi legazi, bobabini benamanxeba amaninzi okudutyulwa.

“Kutyholwa ukuba amadoda amathathu angaziwayo afike kwikhaya lamaxhoba, nalapho afumene inkosikazi iyodwa. Abarhanelwa emva koko bamyalela ukuba atsalele umnxeba umyeni wakhe.

“Ukufika kwakhe, omabini amaxhoba adutyulwa phambi kokuba abenzi bobubi babaleke kwindawo yexhwayelo ngemoto emnyama eluhlobo lweVolkswagen Polo eneepleyiti zobhaliso ezibhalwe CA,” utshilo uMdleleni.

Amatyala amabini okubulala avuliwe, kwaye amapolisa aphanda ngesizathu esibangele uhlaselo.

Amapolisa abongoza nabani na onokuba nolwazi olungakhokelela ekubanjweni kwabarhanelwa ukuba eze ngaphambili. Qhagamshelana noMcuphi uWarrant Officer Tukwayo ku082 403 279, okanye unganikezela ngolwazi ungachazi igama lakho usebenzisa iCrime Stop ku08600 10111.