Unozakuzaku waseBurundi kweli uAlexis Bukuru kwakunye noSodolophu woMasipala wesithili saseChris Hani uLusanda Sizani.
USodolophu woMasipala wesithili saseChris Hani uLusanda Sizani wamkele ngokusesikweni unozakuzaku welizwe laseBurundi kweli uAlexis Bukuru.
UBukuru ukutyelelo lweentsuku ezimbini kwisithili saseChris Hani ukuza kukhangela indlela yokuphucula amaqhina ozakuzelwano phakathi kwala mazwe mabini.
Ingxelo yoMasipala waseChris Hani ithi olu tyelelo lukwajoliswe ukusungula amaqhina onxibelelwano ngeenjongo zokurhwebelana phakathi kwesi sithili nelizwe laseBurundi. Othethe egameni loMasipala wesithili saseChris Hani uBulelwa Ganyaza ucacisa banzi ngolu tyelelo.
“Injongo ephambili kukugxila kwezemfundo, ezolimo, ezorhwebo kwakunye nolawulo ngokubanzi,” kutsho uGanyaza.
Obu budlelwane kulindeleke ukuba buncedise ukusungula uphuhliso olubanzi ngokudala amathuba emisebenzi phakathi kwamahlakani achaphazelekayo.
“Unozakuzaku waseBurundi ukubalule ukuba banomdla omkhulu kwezolimo, umbane, utyelelo namanye amathuba anokuvela kobu budlelwane,” kucacisa uGanyaza.
Ingxelo yezizwe ezimanyeneyo ibonisa ukuba ilizwe laseMzantsi Afrika yenye yeendawo ezithandwa kakhulu ngabantu baseBurundi njengendawo yokuphambukela.
“Kulindeleke ukuba eli gqiza lityelele iziko lonkcenkceshelo iShilow, ifama yobisi iAmadlelo, iziko lonkcenkceshelo eQamata nendawo yokucoca amanzi eTsomo nezinye ke iindawo,” kutsho uGanyaza.
Abaphambukeli baseBurundi kweli bangabanikazi beevenkile ezincinci ezilalini nasezilokishini.