Tshintsha ikhadi lakho eligolide lakwaSASSA ngoku!
I-SASSA ikhuphe isikhumbuzo sokugqibela kubantu abafumana inkamnkam ukuba batshintshe amakhadi abo agolide akwaSASSA basebenzise amakhadi amatsha amnyama akwaPostbank. Ixesha elisikiweyo lokutshintsha la makhadi landisiwe izihlandlo ezininzi, kodwa kweli tyeli umhla wokugqibela usekupheleni kwale nyanga, nge28 kweyoMdumba.
Amakhadi agolide akwaSASSA ayayekiswa kwaye abantu abafumana inkamnkam kufuneka batshintshele kwikhadi elimnyama ukuze baqhubeke nokufumana izibonelelo zabo.
Emva kwalo mhla [28 kweyoMdumba 2025], la makhadi agolide akwaSASSA awasayi kusebenza, kwaye abantu abafumana inkamnkam abangenzanga utshintsho basengozini yokungakwazi ukufikelela kwizibonelelo zabo.
IPostbank ibongoza abantu abafumana inkamnkam ukuba batshintshele kula makhadi matsha amnyama ngokuthi bacofe *120*218*3# ukuze bafumane iindawo apho la makhadi afumaneka khona kufuphi neendawo abahlala kuzo.
Abantu abafumana izibonelelo zeSASSA banokuqokelela amakhadi abo amatsha amnyama kwiivenkile ezichongiweyo nakumasebe ePostbank. Ezinye zeendawo zokuqokelela ezigunyazisiweyo ziquka:
- Iivenkile zakwaBoxer
- Iivenkile zakwaPick n Pay
- Iivenkile zakwaShoprite
- Amasebe ePostbank
Amaxwebhu afunekayo
Xa uqokelela ikhadi lakho elimnyama leSASSA Postbank, qinisekisa ukuba uza noku kulandelayo:
Isazisi sakho saseMzantsi Afrika: Nokuba yincwadi yesazisi eluhlaza, isazisi eluhlobo lwekhadi, okanye isiqinisekiso sesazisi sethutyana.
Ubungqina bokubhaliswa kwesibonelelo sikaSASSA: Ikhadi lakho elidala eligolide okanye naluphi na uxwebhu oluqinisekisa ukuba uyasifumana isibonelelo sikaSASSA.
Iimbacu: Kufuneka ube neleta yemvume evela kwaSASSA.
Ileta yegunya: Umntu oza egameni lomntu ofumana inkamnkam kufuneka eze nesazisi sakhe kunye neleta yakwaSASSA ebonisa ukuba wonyulwa ukuba ammele lo mntu.