UDonald Trump ungene ngokusemthethweni kwisikhundla sakhe njengoMongameli wama47 waseMelika. Umfanekiso: Christopher Furlong/Getty Images
UMongameli omtsha welizwe laseMelika, uDonald Trump, ungene ngokusemthethweni kwisikhundla sokongamela ela lizwe isihlandlo sesibini emva kokwenza isifungo esidlangalaleni.
UTrump uyitshaye isaqhuma ethembisa iinguqu ezininzi eziquka ukupheliswa kwemitshato yabasini sinye nokugxothwa kwabaphambukeli abangekho mthethweni.
Ngomhla wesithandathu kwinyanga yoMqungu ngo2021 abalandeli bakaTrump baqhankqalaza bebonisa ukungamkeli ukumiselwa kukaJoe Biden njengoMongameli.
“Umtshato uphakathi kwendoda nowasetyhini kuphela, awukho omnye umtshato owamkelekileyo,” utshilo uTrump.
Kwesi isihlandlo uBiden ubeyinxalenye yokufungiswa kukaTrump njengoMongameli, kwaye abalandeli bakhe abakhange benze ngxaki ibonakalisa ukuchasa le nkqubo.
Kuthiwa uninzi labo baza kunikwa uphumaphele kwela lizwe ngenxa yokuba bengenazimpepha mvume, basuka kumazwe aseAfrika, kwaye kukho kubo abo banempepha mvume zethutyana.
UTrump ngoyena Mongameli wakhe wafungiswa emdala kweliya laseMelika nanjengoko sele eminyaka ingamashumi asixhenxe anesibhozo.
UMongameli welizwe laseRussia uVladimir Putin ubengowokuqala ukuvuyisana noTrump emva kokuba efungiswe ngokusemthethweni njengoMongameli.
UPutin ukwasebenzise eli thuba ukuvakalisa iminqweno yakhe ngolawulo lukaTrump.
“Sele sivile ukuba uMongameli omtsha welizwe laseMelika ufuna ukuvuselela ubuhlobo phakathi kwelizwe laseMelika nelizwe laseRussia singakuvuyela kakhulu oko,” utshilo uPutin.
UPutin uthi le ndoda ivakalisa umnqweno wayo wokuthintela imfazwe yesithathu yehlabathi enokubangela ingxaki enkulu kuluntu lwehlabathi.
“Siyawamkela umbono wakhe, kwaye sivuyisa naye ngenene kuba ubonakala esiza neenguqu ezintsha eziza kunceda wonke ubani,” kutsho uPutin.
UTrump ebekwafungele ukuba uza kunyusa irhafu yeemveliso ezingena kwela lizwe ezisuka kumazwe angamalungu weBRICS ngelizama ukugcina ubunganga bedola yaseMelika.