Yonwabela umculo kwi-Ebubeleni Music Festival eGqeberha
UDisemba uza kufana nomnye eGqeberha, nanjengoko iEbubeleni Music Festival ibuya kwakhona nolonwabo olukwizinga eliphezulu laminyaka le.
Lo mnyhadala ukunyaka weshumi elinesithathu uqhuba ngokonwabisa uluntu eGqeberha. Abaququzeleli balo mnyhadala bathembisa ngolonwabo oluvangiweyo, umculo, inkcubeko namava obomi.
IEbubeleni Music Festival iza kubanjelwa kwibala iNelson Mandea Bay ngeCawa, umhla we29 kule nyanga yoMnga.
Kulo nyaka lo mnyhadala uza kubalula iminyaka engamashumi amathathu enkululeko yoMzantsi Afrika, nalapho kuza kubhiyozelwa oku ngobunye, kunye nenkcubeko ngomculo nobugcisa.
Lo mnyadala uqhayisa ngoluhlu olwahlukeneyo lweemvumi zephondo leMpuma Koloni noMzantsi Afrika uphela. Phakathi kweemvumi eziza kudyusha eqongeni ziquka uZonke Dikana, Mandisi Dantyis, Sjava, Cairo CPT, Mr Thela, Daliwonga, Zuko SA, Mawhoo, Zee Nxumalo, Betusile, Joliza Bhacasoul, Nomabotwe, kunye noLindo Mtangayi.
Ukanti neeDJ ziza kushukumisa uluntu kulo mnyhadala nalapho kuzo ziquka uKorey G, XS, Hermanos, Malicon, Nicki Sandra, Sbhizo Mcwrist, kwakunye noXceedo.
Ababhexeshi ngolu suku ngusaziwayo woMzantsi Africa uSomizi, nokunyaka wesithathu ezibandakanya nalo mnyhadala, uMafa Bavuma woMhlobo Wenene FM, uSlujah weTru FM, kwakunye noMakaziwe Tsako weNkqubela FM.
“Nanjengoko uMzantsi Afrika ubhiyozela iminyaka engamashumi amathathu enkululeko eMzantsi Afrika, iEbubeleni inika imbeko kwesi siganeko sibalulekileyo ngokuqaqambisa ubugcisa benkcubeko esibophelelayo.
“Ingaphezulu komsitho womculo, liqonga lokubonisa uhambo lwethu njengesizwe, ngelixa sonwabele usuku oluzaliswe yitalente ekhethekileyo ngohlobo lwepikniki,” kutsho abaququzeleli balo mnyhadala.
Lo mnyhadala uxhaswa ngempumelelo yiNelson Mandela Bay Municipality, iNational Department of Sport, Arts & Culture, iNational Arts Council, iEastern Cape Parks & Tourism Agency, iSAMPRA kwakunye neMahambehlala Communications.
Lo mnyhadala ungeCawa umhla we-9 kweyoMnga 2024, ukanti amasango avulwa ngentsimbi yeshumi kusasa.
Amatikiti ayafumaneka eWebtickets, ePick n Pay, nakwiivenkile zakwaBoxer.