UChidimma Adetshina urhoxa kuMiss SA

Cwayita Nondula|Published 7 months ago

UChidimma Adetshina ubhengeze ukuba uyarhoxa kukhuphiswano lukaMiss SA ngoLwesine.

UChidimma Adetshina obengenele uMiss SA nobesematheni ngenxa yemibuzo ngobuzwe bakhe, urhoxile kolu khuphiswano.

Ubhengeze oku kwikhasi lakhe lika-Instagram namhlanje, ngoLwesine.

UAdetshina unemvelaphi yaseNigeria naseMozambique ngenxa yabazali bakhe, kodwa uzalelwe eMzantsi Afrika kwaye kuthiwa abazali bakhe banamaphepha-mvume okuhlala eMzantsi Afrika.

Izolo, ngoLwesithathu iSebe lezeKhaya lihlaziye abantu ngophando lwabo oluqhubekayo oludize ukuba umama ka-Adetshina utyholwa ngokuba isazisi senkosikazi yoMzantsi Afrika nto leyo eyabangela ukuba le nkosikazi ingakwazi ukubhalisa umntwana wakhe kwiminyaka engamashumi amabini anesithathu (23) eyadlulayo.

UAdetshina ubhale kwikhasi lakhe lika-Instagram: “Ndifuna ukuqala ngokubulela wonke umntu oye wema ecaleni kwam kwasekuqaleni kohambo lwam lukaMiss South Africa. Ndinombulelo ongazenzisiyo ngothando nenkxaso endiyibonisiweyo.

“Ukuba yinxalenye yokhuphiswano lukaMiss South Africa 2024 ibe luhambo olumangalisayo nangona kunjalo, emva kokucingisisa nzulu, ndithathe isigqibo esinzima sokurhoxa kukhuphiswano ngenxa yokhuseleko kunye nentlalo-ntle yosapho lwam kunye nam. Ndihamba nentliziyo ezele ngumbulelo.”

Abantu bahlukene ngokwezimvo ngalo mba, abanye bebesithi makamsuse uMiss SA kuba bekholelwa ukuba akangommi waseMzantsi Afrika uAdetshina. Ngelixa abanye bekholelwa ukuba ukulungele ukuba yinxalenye yokhuphiswano lukaMiss SA kuba wazalelwa eMzantsi Afrika.