UShabalala unced' iChiefs wathumela umyalezo kuHugo Broos!
Abadlali beKaizer Chiefs bevuyela igowuli likaMduduzi Shabalala alifake emdlalweni weBetway Premiership kule veki eFNB Stadium.
Image: KC/Facebook
Umdlali ohlaselayo, uMduduzi Shabalala, uncede iKaizer Chiefs emva koko wathumela umyalezo ocacileyo kuHugo Broos oqeqesha iqela lesizwe.
Oku kulandele emva kokuba iChiefs itywatyushe iOrbit College ngomwasalala wamagowuli amane kwelinye emdlalweni weBetway Premiership obubanjelwe eFNB Stadium ngorhatya langoLesibini kule veki.
UShabalala uhlahle indlela emdlalweni ngokufaka igowuli lokuqala emizuzwini yokuqala kwisiqingatha sokuqala. Kwisigaba sesibini ufake elinye kwalandela elikaMfundo Vilakazi noFlavio da Silva oyinkathazo.
Amakhosi anyukele phezulu ayokuthi ngcu kwindawo yesibini phambi kwemidlalo edlalwe phakathi evekini. Emva kweshumi elinanye lemidlalo, Amakhosi anamashumi amabini anesibini amanqaku.
Emva kokubetha iAS Simba neOrbit College ngamagowuli abalekayo, kukhangeleka ngathi iyasombululeka ingxaki yokunqongophala kwayo. Emidlalweni emine edlale ntanganye kuyo iChiefs, ingxaki ibinye: kukungakwazi ukusebenzisa amathuba.
Ukuphakama kukaShabalala, Ighodaro noDa Silva kungenzeka ukuba kuza nolonwabo kwiChiefs engena nzulu kwiCAF Confederation Cup. Nangona uBroos ebonakalise ukungabathandi abadlali beChiefs - kodwa umbizile uShabalala emidlalweni embalwa egqithileyo.
Phambi kokubhengeza amagama wabadlali abaza kudlalela aBafana Bafana emidlalweni yobuhlobo, uShabalala uphakamise isandla sakhe. Uthembise ngokudlala ngokuzimisela emva kokufumana amagowuli amabini.
"Ndibulela iKaizer Chiefs endinike ithuba lokuyidlalela. Bekunzima kum kwicala lamagowuli kule sizini," utshilo uMdu ongomnye wabadlali ekuthenjelwe kubo ngabaqeqeshi. "Ndivuya kakhulu ngoba namhlanje siqhube kakuhle. Sifumene amagowuli amane emdlalweni okokuqala kule sizini.
"Mna ndiwenzile umsebenzi, enye nenye into ixhomekeke kumqeqeshi uHugo Broos. Nokuba uthatha isigqibo esinjani ndakusamkela. Mna ndiza kuqhubela phambili nokusebenza nokuzimisela," utshilo uShabalala.
Amakhosi aza kundwendwela iMagesi FC emdlalweni weBetway Premiership oza kube usePolokwane ngomhla wamashumi amabini kule nyanga yeNkanga.