UColin Nathan ucacisa umahluko phakathi kwakhe noMatiti
UColin Natha weNo Doubt Management ubangisana noAyanda Matiti weXaba Promotions ngembethimanqindi enguLandile Ngxeke.
Image: Facebook
Umthelekisi ophambili emdlalweni wamanqindi, uColin Nathan, usikhabe ngawo omane isityholo esithi yena urhwebeshela kuye iimbethimanqindi zeXaba Boxing Promotions.
Oku ukuthethe emva kokuba uAyanda Matiti efunge wamunca iintupha ngelithi uza kulwela ukuhamba kukaLandile Ngxeke ngoba usenesivumelwano naye. Kwiveki ephelileyo, uNgxeke uzibandakanye nenkampani yabathelekisi (iNo Doubt Management) ekhokelwa nguNathan.
Iingxelo zithi uNgxeke yimbethimanqindi yesithathu eshiye isitali somthelekisi waseMonti yaya eGoli. Kwiminyaka edlulileyo, yinqwaba yeembethimanqindi eziyinikele umva iMpuma Koloni ngenxa yokunqaba kwamathuba angcono.
USivenathi Nontsinga noPhumelela baya kuNathan emva koko wabenza iintshatsheli kwaguquka nobomi babo. Akothusi ukulandelwa kwabo zezinye iimbethimanqindi ngoba umahluko uyabonakala.
"Akukho nto embi endiyenzileyo. Ndihambe ngqo emthethweni weBoxing South Africa," utshilo uNathan ephendula uMatiti ovakalise ukungonwabi ngokutsho kwephephandaba leveki eMonti.
"UNgxeke uze kum engenaso isivumelwano. Ngoku sinaso isivumelwano esipasiswe yiBoxing South Africa. Yonke into ndiyenze ngendlela esebenza ngayo kwelam icala. Amanqindi lishishini futhi wonke umntu uyandazi ukuba mna ndizikhathalele iimbethimanqindi zam.
"Kwenzeka izinto ezinje xa ungayikhathalelanga into oyenzayo. Mna ndizihloniphile iimbethimanqindi zam. Ndisebenza ngokuzimisela ngoba andinguye umntu osebenzisa ipolitiki ukuze ndifumane izinto," utshilo uNathan kutshanje.
UNgxeke ucacise mhlophe into ebangele afune ukuba yimbethimanqindi ephantsi kukaNathan. "Ndiyakhula, ixesha alilindanga mna. Ekhaya kujongwe kum ukuze kutyiwe. Ndigqibe kwelokuba ndize kwiNo Doubt Management.
"Ndifuna ukulwela intshinga yehlabathi futhi ndiyamazi uNathan uza kuyenza lo nto. Kuhle ukuba lapha kwam," utshilo uNgxeke emva kokutyikitya isivumelwano esitsha. UNathan uthe ikhona into ayiphekayo eza kuthatha uNgxeke imbeke kwenye indawo.