Babuye bedakumbile aBanyana Banyana emva kweWAFCON
ABanyana Banyana bavale iWAFCON yalo nyaka behleli kwindawo yesine emva kokubethwa yiGhana kwiipenela ngo'4-3.
Image: Safa
Eyona tumente yebhola ekhatywayo yamantombazana kwizwekazi le'Afrika, iWomen's Africa Cup of Nations (WAFCON), isongiwe kwimpelaveki egqithilethileyo emva kokuvelisa iintshatsheli ezintsha kwakhona.
Ngelishwa lomhluzi wamanqina, ezo ntshatsheli ayinguwo uMzantsi Afrika oye eMorocco uziintshatsheli ezikhuselayo. ABanyana Banyana babuyele ekhaya bedakumbile ngenxa yokungaqhubi kwabo kakuhle ngendlela ebekulindeleke ngayo.
Babethwe yiGhana ngo'4-3 kwipenela emdlalweni wokugqibela kwiWAFCON emva kokuba umdlalo uphele amazwe omabini ebambene ngo'1-1 kwixesha elongezelelweyo eZaouli Stadium, eCasablanca, ngoLwesihlanu ogqithileyo.
Ukubethwa kwawo uMzantsi Afrika kuthethe ukuthi ivala itumente uhleli kwindawo yesine waphoswa naliwonga lebronze elifunyenwe yiGhana ebambe indawo yesithathu. Iintshatsheli ibe yiNigeria ebethe iMorocco ngo'3-2 emalweni weWAFCON wokugqibela.
UKapteni waBanyana Banyana, uRefiloe Jane uvakalise ukukhathazeka kwabadlali emva kokuvala itumente kungekho nto esandleni. ABanyana Banyana badlale namazwe aquka iGhana, iTanzania, iMali neSenegal phambi kokubethwa yiGhana emdlalweni wendawo yesithathu.
Noxa uLinda Motlhalo, uBambanani Mbane noJermaine Seoposenwe bekwazile ukuzifaka emnatheni ezabo ibhola kwiipenela - kodwa unozinti weGhana, uFindid Konlan wenze umsebenzi omhle ngethuba evala ebezikhatywe ngamathemba oMzantsi Afrika aquka uSibulele Holweni noHilda Magaia.
"Siphoxeke kakhulu ngenxa yokuphuma kwiWAFCON singenanto esandleni. Bekungekho nto ilula kwitumente yalo nyaka kwicala lethu singabadlali ngoba zikhona izinto ebezisiphazamise singekangeni ebaleni. Nangona kunjalo, siye sazama ukulibala ngazo. Eyona nto ebesiyifuna kukukhusela indebe," utshilo uJane emva komdlalo wokugqibela.
Ngoku uMzantsi Afrika uza kuzama ukwenza ngcono kwiWAFCON elandelayo ngoba ingawusa kwiFifa World Cup elandelayo. "Sibuyela ekhaya kusekho umsebenzi omninzi ofuna ukwenziwa. Ibaluleke kakhulu iWAFCON ezayo ngoba ingasinika ithuba lokuya kwitumente yehlabathi.
"Sinethemba lokudlala kakuhle kuyo. Kodwa phambi koko, kufuneka sidlalele ukuya kwiWAFCON. Noxa singaphumelelanga - kodwa Sinethemba lokuba zikhona izinto ezintle esigoduka nazo emva kwetumente," utshilo uJane.