URassie Erasmus wonelisekile ngumsebenzi owenziwe eNelson Mandela Bay Stadium
Amabhokobhoko evuyela ukufumana itrayi emdlalweni wovavanyo abethe kuwo i-Italy ngo'45-0, eNelson Mandela Bay Stadium, eGqeberha.
Image: BACKPAGEPIX
Uvakalise ukoneliseka umqeqeshi okulinganiselweyo emva kokuba Amabhokobhoko evuthulule amaTaliyane ngo'45-0 emdlalweni obushushu eNelson Mandela Bay Stadium, eGqeberha, ngorhatya lwangoMgqibelo odlulileyo.
Nangona bekukho inkwankca yokubusika, abalandeli bombhoxo bagcwalise ibala laseGqeberha elagqibela ukusingatha umdlalo weSpringboks ngonyaka ka2018. Emva kokuphumelela ngendlela engancumisiyo eKapa ekuqaleni kwale nyanga, iintshatsheli zehlabathi ziquthise i-Italy ayachola naphantsi.
URassie Erasmus akafunanga ukuyenza into enkulu ukubetha amaTaliyane nakubeni iqela lakhe lidlale phantse wonke umdlalo lingaphelela ngenxa kaJasper Wiese ofumene ikhadi elibomvu emva kokungquba omnye umdlali. Njengesiqhelo, uErasmus uthe gqi namagqinga amatsha ahlakaze amaTaliyane aziingceba ebaleni.
Azamile wona ukuxhathisa kwisigaba sesibini abehamba emva kuso ngo'24-0 kodwa amakhwenkwe kaRassie Erasmus aye akelema ngamandla emizuzwini yokuphela komdlalo obutshisa bhe. "Ndonelisekile noko," utshilo uErasmus emva kokuba abadlali bakhe belungise iimpazamo abazenze emdlalweni wovavanyo wokuqala abawuphumelele ngo'42-24 eDHL Stadium.
"Khange kufakwe amanqaku amaninzi kuthi ngokuya besidlala neBarbarians emvuleni. Emdlalweni ogqithileyo sikwazile ukuphumelela ngo'42-24. Into endingayithetha kukuba kuyo yonke le midlalo, abadlali abaninzi abatsha bafumene amathuba okudlalela iSpringboks okokuqala," utshilo umqeqeshi woMzantsi Afrika.
Njengokuba uRassie Erasmus enenqwaba yabadlali abatsha abavavanyileyo emidlalweni emithathu egqithileyo, uthi unethemba lokuba uza kuphuma neqela elomeleleyo aza kutyhala ngalo emdlalweni olandelayo eMbombela Stadium, eMpumalanga, xa Amabhokobhoko eza kube ethathana neGeorgia.
"Sinethemba lokuba emva kokudlala neGeorgia, siza kufumana iqela eliluqilima esiza kuya ngalo emidlalweni yeCastle Lager Rugby Championship," utshilo uRassie, oqinisekisileyo ukuba uJasper Wiese uxa kufumana inkxaso emva kokukhutshwa kwangoko emdlalweni obuseGqeberha.