UHugo Broos uthi uMofokeng angaya phesheya - kodwa....
Umqeqeshi weqela lesizwe, uHugo Broos, uthi uRelebohile Mofokeng wePirates ukulungele ukudlala eYurophu.
Image: Yanga Nothanga/Maya Images
Umqeqeshi waBafana Bafana, uHugo Broos, uxelele iintatheli ukuba uRelebohile Mofokeng ukulungele ukudlala phesheya kolwandle - kodwa wamlumkisa ngelithi aye endaweni emlungeleyo.
Oku ukuthethe emva kokuba ebhengeze amagama abadlali njengokuba iqela lesizwe lilungiselela ukudibana neTanzania neMozambique emidlalweni yobuhlobo. UMofokeng uyinxalenye yeqela lakhe kwakhona emva kokudlala kakuhle kakhulu kwi'Orlando Pirates evale isizini ikwindawo yesibini kwiBetway Premiership.
Lo mdlali, onamashumi amabini eminyaka, uzicacisile kwakhona kwisizini yakhe yesibini ukuba ungumdlali osemgangathweni ophezulu. Uncede iPirates ephumelele indebe yeMTN8 ityeli lesithathu waphinda wayinceda kwiCAF Champions League ekhutshwe kuyo yiPyramids ebethe iMamelodi Sundowns yaziintshatsheli.
Egameni lakhe, uMofokeng ufake amagowuli alishumi elinesibhozo emidlalweni engamashumi asibhozo anethoba. Ngaphezulu koko, uncedise abanye abadlali abafake amagowuli angamashumi amabini anambini. UBroos ngumntu ongafuniyo abadlali balapha eMzantsi Afrika bahambe bengaphekekanga kakuhle.
Apha kuMofokeng ugobile ngoba udlale kakuhle oko wanyuselwa kwinqanaba eliphezulu ngonyaka ka2022. UMofokeng ukhe wayokwenza uvavanyo kwiWolverhampton Wanderers FC emva koko wakhonjwa kwamanye amaqela amakhulu eSpain naseScottland. Akukacaci nokuba iPirates ingamkhulula na xa kukho iqela elimfunayo eYurophu.
"Icebiso endingamnika lona uMofokeng lithi makakhethe iqela elimlungeleyo. Ngokufanayo noMbekezeli Mbokazi odlale imidlalo elishumi elinesihlanu kwiPirates. Kulungile ukuya eYurophu - kodwa kubalulekile ukuya kwiqela elikulungeleyo ukuze ufumane amathuba okudlala.
"Kungangcono xa ebengahlala enye isizini kwiPirates. Ndingathi kuxhomekeke emdlalini, kwikhaya lakhe nakumanejala wakhe endinethemba lokuba uza kunceda umdlali ngaphezulu kokujonga ipokotho yakhe," utshilo uBroos.