Zigqugqise kwindebe yehlabathi iiBlitzboke zabuya zithe qhiwu indebe

Babuyela ekhaya bevuya abadlali beqela lesizwe lombhoxo loMzantsi Afrika. Oku kwenzeke emva kokuba iiBlitzboke zibethe iSpain ngo'19-5 emdlalweni wokugqibela weSevens World Cup ebibanjelwe eLos Angeles, eMelika. Okuthe kwachwayitisa abalandeli bombhoxo kakhulu kukuba iqela lesizwe loMzantsi Afrika libuyele ekhaya lingaphulukana namdlalo.

Endleleni eya emdlalweni wokugqibela, iiBlitzboke zibethe amazwe aquka iNew Zealand, iFrance, iGreat Britain neArgentina. Umqeqeshi weeBlitzboke, uPhilip Snyman, uvakalise uchulumanco olungummangaliso emva komdlalo wokugqibela watsho encoma kakhulu umsebenzi omhle owenziwe ngamakhwenkwe wakhe.

"Abadlali bethi benze umsebenzi oncomekayo emidlalweni ebingempelaveki," utshilo uSynam emva kokugqugqisa kweqela lakhe eMelika. Umsebenzi omhle owenziwe ngabadlali bombhoxo abasedyongo uhamba emzileni owenziwe ngaMabhokobhoko aziintshatsheli zehlabathi izihlandlo ezine.

Okwenzeke ngempelaveki eMelika kugqamisa umbhoxo waseMzantsi Afrika - ebethelele indawo yayo ephezulu emdlalweni wombhoxo kwihlabathi lonke. "Abadlali bethu bakufanele kukunconywa emva komsebenzi abawenzileyo. Kule sizini ebekhona amaxesha esidlale kakuhle ngawo, ekhona namabi - kodwa kwimpelaveki egqithileyo, bavelise umsebenzi omhle kakhulu.

"Umqeqeshi angawenza onke amalungiselelo - kodwa abona bantu benza umsebenzi ngabadlali ebaleni," utshilo umqeqeshi. Naye uKapteni weeBlitzboke, uSelvyn Davids, waleke umsundulo ngelithi oogxa bakhe basebenzile futhi zininzi izinto abazifundileyo kwitumente abayivale beziintshatsheli zehlabathi.

"Ndiyaziqhenya ngomsebenzi owenziwe ngabadlali. Bebezimisele ngendlela emangalisayo. Indlela esixhasene ngayo iyancomeka. Loo nto iyodwa, kum yimpumelelo. Ukudlala umbhoxo osemgangathweni ophezulu kuko okusinike impumelelo esiyivuyelayo ngoku," utshilo uDavids, ofumene iwonga lomdlali oqaqambileyo emdlalweni wokugqibela.