UDarren Johnson , oncede iChippa United emdlalweni ogqithileyo, unethemba lokufumana amanye amathuba emva kokudlala kakuhle.
Image: Yanga Nothanga
Unozinti weChippa United, uDarren Johnson, ulibambe ngezandla zozibini ithuba lokudlala alinikiweyo. Oku kucace kakuhle ngethuba enceda iChippa United ebethe AmaZulu ngamagowuli amabini kweliny emdlalweni weBetway Premiership obubanjelwe eBuffalo City Stadium kwimpelaveki egqithileyo.
Indlela AmaZulu adlale ngayo ibiphucuke kakhulu - kodwa abuyele KwaZulu-Natal esophisa emva kokuvinjwa impumelelo abeyifanele nguJohnson oye wangumqobo omkhulu endleleni yawo. UJohnson, 28, akafane alifumane ithuba lokudlala ngenxa kaStanley Nwabali obengekho emdlalweni odlulileyo.
Kodwa okuncomekayo kukuba uyayinceda iChippa United xa enikwe ithuba lokudlala. Emva komdlalo, uThabo September uwuncomile umsebenzi omhle owenziwe nguDarren - kodwa khange azibophelele ngokumnika elinye ithuba lokudlala.
"Ngunozinti odlala kakuhle kakhulu uDarren. Ejimini uzimisele kakhulu futhi usebenzela ukumsusa uNwabali kwindawo yokuqala. Nakunyaka ophelileyo wakhe wasinceda. Uphindile namhlanje kukubi," utshilo uSeptember emva komdlalo eMonti.
Ethetha neentatheli emva komdlalo, uDarren ubulele uThixo omnike ithuba lokudlala. "Kudala ndilinde ithuba lam lokudlala. Ndilibulela kakhulu ithuba endilifumeneyo. Ndibulela umfazi nabantwana bam abandixhasayo ebholeni," utshilo uDarren echwayitile emva komdlalo.
"Ndicinga ukuba ndenze ngokwaneleyo ukuze ndifumane elinye ithuba. Andikhalazi okanye ndifundekele xa ndingadlali, ndidlala ngokuzimisela xa ndinikwe ithuba ngoba kufuneka ndondle intsapho yam," utshilo uDarren.
Iqela laseMpuma Koloni liza kuntingela KwaZulu-Natal - apho liza kudubana neGolden Arrows emdlalweni ongecala emva kwentsimbi yesithathu emalanga ngoMgqibelo, eMpumalanga Stadium. Omabini amaqela akhuthazekile emva kokuphumelela imidlalo yawo egqithileyo.
IChippa United iya kuBafana Bes'thende ikhangela amanqaku amathathu ukuze ingene kwiTop-8. Kanti nayo iGolden Arrows ifuna ukufumana amanqaku amathathu ukuze ibhekele emaqeleni ajingelwa lizembe.
Related Topics: