Abalandeli beKaizer Chiefs bebonisa inkxaso yabo engagungqiyo emdlalweni weBetway Premiership obusekuqaleni konyaka.
Image: Yanga Nothanga/Maya Images
Emva kokugqwidiza kweKaizer Chiefs kwakhona emdlalweni ogqithileyo, uNasreddine Nabi wenze isicelo kubalandeli. Oku ukwenze emva kokuba iChiefs ibethwe yiGolden Arrows ngamagowuli amabini kwelinye emdlalweni weBetway Premiership obubanjelwe eMoses Mabhida Stadium, eThekwini, emalanga ngoMgqibelo odlulileyo.
Ibingumdlalo weshumi kwiBetway Premiership ephulukene nawo iChiefs kule sizini. Kanti ibibethwa okwesibini yiGolden Arrows kwisizini enye. Mhlawumbi iChiefs ngeyikwazile ukubetha Abafana Bes'thende ukuba uYusuf Maart ebeyifakile ipenela ecikiweyo ekuqaleni kwesiqingatha sokuqala.
Ukwazile ukusivala eso sikweleti ngegowuli alifakileyo emva koko - kodwa abalandeli abathile bagxeke uMaart njengoyena mdlali obangele ibethwe iChiefs engakwazanga ukufaka amagowuli emdlalweni. UNabi uthe abalandeli mabagxeke yena - hayi abadlali bakhe. Amakhosi asahleli kwindawo yethoba emva kokuphoswa ngamanye amanqaku abeza kuwanyusela phezulu.
"Ndicinga ukuba eyona nto ephazamisayo kukudlala kakuhle emva koko singakwazi ukufumana amagowuli. Kufuneka ufake amagowuli ukuze uphumelele umdlalo. Ungayijonga imidlalo, yiChiefs edlala kakuhle. Phantse emidlalweni emininzi kunjalo," utshilo uNabi emva komdlalo.
Amakhosi asecicini lokuphoswa yiTop-8 kwakhona emva kokubethwa emidlalweni ilandelelana. "Isisombululo semeko esikuyo sicacile. Umyalezo endifuna ukuwunika abalandeli nanku: ndicela babe nomonde," utshilo uNabi obebonakala ukuba akanobwanga emva komdlalo obuseThekwini.
"Ndibathembile abalandeli ngoba bayayithanda iChiefs. Ndicela umonde. Ndiyakuxolisela okwenzekileyo. Ndim owokuqala ekunzima ukuzamkela iziphumo ezinje. Siyiqonda kakuhle indlela abaziva ngayo.
"Sizimisele ukusebenzela iChiefs ngokukhulu ukuzimisela. Andinayo ingxaki xa kuhlaselwa mna, ndicela kungahlaselwa abadlali. Masikhuseleni iqela ngoba isizini ayikapheli. Izinto ziza kutshintsha kwixesha elizayo," utshilo uNabi emva komdlalo eMoses Mabhida Stadium.
Related Topics: