UDino Ndlovu ngumdlali omtsha weMarumo Gallants kude kuphele isizini eqhubekayo.
Image: Facebook
Emva kwethutyana edinga iqela angalidlalela eMzantsi Afrika, uDino Ndlovu ufumene indawo kwiMarumo Gallants. Ingxelo ejikeleza kumajelo eendaba ithi uNdlovu utyikitye isivumelwano esiza kuphela xa kuphela isizini eqhubekayo.
Kulindeleke ukuba uNdlovu abe ngomnye wabadlali abaphambili abaza kunceda iMarumo Gallants kwiinzame zayo zokuphepha izembe emva kwexesha elide ingaqhubi kakuhle kwiBetway Premiership okuthe kwanyanzela abaphathi bagxothe uDan Malesela kwinyanga edlulileyo.
Ngoku iintambo zibanjwe nguAbdelslam Ouaddou osele enemidlalo emihlanu phantsi kwegama lakhe. Ikwazile ukunyakaza iMarumo Gallants emva kokuphumelela imidlalo emithathu phantsi kuka-Ouddou owangena endaweni kaMalesela ongumqeqeshi weBaroka FC eyayikhe yamtyekeza kunyaka ophelileyo izama ukunyukela kwiBetway Premiership.
UNdlovu, 35, ubuyele eMzantsi Afrika emva kokudlala kakuhle kwiSakaryaspor yaseTurkiye. Phantse kuwo onke amaqela awadlaleleyo ufake amagowuli kuwo ngendlela encomekayo. Ngoba mdala, iMarumo Gallants, iza kuqongqotha nje imongo ngoku. Iza kuyamkela nayiphi na indlela anokuyinceda ngayo ngoba ifuna ukusuka kwindawo embi ekuyo kwiBetway Premiership.
Nakubeni iliso layo lisemidlalweni yeBetway Premiership, kwelinye icala isamelwe yiNebank Cup eza kudibana ne'Orlando Pirates kuyo. Nangona ingathanda ukubetha iPirates iye phambili - kodwa eyona nto ebaluleke kakhulu kukugcina indawo yayo kwiBetway Premiership enamaqithiqithi abhetele.
Related Topics: