Abadlali bevuyisana noRelebohile Mofokeng emva kokunceda aBafana Bafana ababethe iLesotho kwiveki ephelileyo emdlalweni obuseLimpopo.
Image: Backpagepix
Kugquba umoya omhle enkampini yeqela lesizwe loMzantsi Afrika. Oku kwenzeka emva kokuba aBafana Bafana benyathele iBenin bayilahla phantsi ngamagowuli amabini eqandeni emdlalweni ohlakulela i2026 Fifa World Cup obuseStade Felix Houphouet-Boigny, eAbidjan, ngoLwesibini wale veki.
Amagowuli abaphumelele ngawo aBafana Bafana afakwe nguLyle Foster noJayden Adams obefumene igowuli nasemdlalweni obungoLwesihlanu odlulleyo ePeter Mokaba Stadium, eLimpopo. Emva kokuphumelela imidlalo emibini ilandelelana, uMzantsi Afrika uhleli phezulu kuGroup C ngamanqaku alishumi elinesithathu.
Nangona kunjalo, umqeqeshi ubalumkisile abadlali bakhe ngelithi bangayekeleli ngoba abakafiki entanjeni. UMzantsi Afrika ujongene nengxaki embi emva kokudlalisa uTeboho Mokoena enamakhadi atyheli amabini emdlalweni obukwiveki ephelileyo. Njengokuba iLesotho kusithiwa ifake isikhalazo, uMzantsi Afrika ungoxuthelwa amanqaku amathathu.
Nokuba angathathwa loo manqaku, uMzantsi Afrika uza kuhlala phezulu kuGroup C ngoba onke amanye amaqela akakwazanga ukuphumelela eyawo imidlalo ekuqaleni kwale veki. "Kuthathe ixesha elide ukwakha iqela esinalo ngoba kwakunzima kunyaka wethu wokuqala.
"Into eyasincedayo kukusebenzisa abadlali kwiindawo ezibafaneleyo. Ngoku sineqela elomeleleyo futhi esingaliguqula xa sifuna," utshilo uBroos echulumancile emva komdlalo. "Sineqela elinamandla ngoku futhi akukho nalinye iqela esiloyikayo. Into ekufanele siyenze kukuqhubela phambili nomsebenzi omhle esiwenzayo.
"Akufuneki sicinge ukuba sesifikile kwitumente yehlabathi. Kufuneka sikuphephe ukwenza ubudenge," utshilo uHugo Broos ozibopheleleyo ukuba uza kubuyisela uMzantsi Afrika kwitumente yehlabathi emva kweminyaka engaphaya kweshumi uphoswa. ABafana Bafana baseza kudlala neNigeria, Lesotho, iRwana neZimbabwe kwakhona.
Related Topics: