Abadlali beFuture United bevuyela indebe abayifumene emva kokubetha iMnquma Hotspurs FC emdlalweni wokugqibela weNozulu Youth Legacy obubanjelwe eWSU, eGcuwa, ngempelaveki egqithileyo.
Image: Facebook
Iqela lebhola ekhatywayo, iFuture Boys United FC, ligqugqise lifika kwingxikela yetumente ebiseGcuwa labuyela eMonti liphethe ishumi lonke lamawaka erandi (R10 000). Oku kwenzeke emva kokuba iFuture Boys ibethe uMnquma Hotspurs FC ngegowuli elinye eqandeni emdlalweni wokugqibela weNozulu Youth Legacy Cup obubanjelwe eWalter Sisulu University, eGcuwa, ngempelaveki egqithileyo.
Lishumi elinesithandathu lonke lamaqela ebhola ekhatywayo anabadlali abangaphantsi kweshumi elinesithandathu leminyaka athathe inxaxheba kwitumente ekunyaka westhathu iququzelelwa nguLuxolo Matikinca onguMphathi weSekhukhune United.
Iphehlelelwe emcimbini obungcotshile nobuzinyaswe nguMphathiswa weZemidlalo kweli phondo, uSibulele Ngongo, phambi kokuqala kwemidlalo yamaqela ngoLwesihlanu umhla wamalungelo oluNtu esongwe ngeCawe umhla wamashumi amabini anesithathu. Njengesiqhelo, abaququzeleli betumente benze umsebenzi omhle.
Abadlali bamaqela bangene ebaleni bezimisele futhi besazi kakuhle ukuba iNozulu Youth Legacy Cup inamaqithiqithi ancumisayo kwabo baqhube kakuhle. Umqeqeshi weFuture Boys United, uLuyolo Lekwe, uvakalise uchulumanco olukhulu emva komdlalo ophunyelelwe liqela lakhe ebunzimeni.
Okumvuyise kakhulu kukuba iFuture Boys United iphumelele iqala ukudlala kwitumente enomtsalane nakumaqela angaphandle kweGcuwa. "Sivuya kakhulu. Bekunzima kuthi ngoba besiqala ukudlala kule tumente. Mkhulu umsebenzi esiwenzileyo - kodwa ndifuna ukuncoma uMnu. Matikinca ngokusingatha itumente engaka. Ingase abantwana beli phondo bayigcine inje," utshilo uLekwe encumile.
"Size sizilungiselele kakuhle kakhulu apha. Yilo nto esincedileyo kule tumente ukuze siphumelele. Besibajimisa ekuseni nasemalanga abantwana sisebenzisana nabazali babo. Andifuni ukuxoka, ayayidlala ibhola ekhatywayo amaqela aseGcuwa," utshilo uLekwe encoma umgangatho wemidlalo.
Ngenxa yeziyobisi ezithatha ikamva labantwana, umqeqeshi uthe basebenzisa imidlalo njengeyona ndlela yokubaqokelela ndawonye. Umdlali oqaqambileyo kwitumente yalo nyaka nguJuneelin Estree.
Related Topics: