Abaqeqeshi abangamashumi amabini anesithathu bafumene izatifiketi zabo ezigunyaziswe yiSouth African Football Association emva kokufumana uqeqesho olusemgangathweni kwindibano yocweyo ebiququzelelwe yiNozulu Youth Legacy kunyaka ophelileyo eGcuwa.
Image: Uthunyelwe
Kuqhwatyelwe izandla ungenelelo olwenziwe yiNozulu Youth Legacy encedisa abaqeqeshi abasakhulayo ngemfundo. Emva kokuququzelela imidlalo yeNozulu Youth Legacy Cup iminyaka embalwa, uLuxolo Matikinca uqalise iphulo lokulola izakhono zabaqeqesha amaqela asezilokishini nasezilalini.
Ekuzeni kuphela konyaka ka2024, ngabaqeqesgi abakumashumi amabini anesithathu abafumene uqeqesho olusemgangathweni ophezulu (CAF D Coaching License) . Ngabaqeqeshi baseGcuwa, eMthatha, eMonti nakwezinye iindawo abazuze izatifiketi ezigunyaziswe yiSouth African Football Association emva kokuchitha iiveki bencanca ulwazi ngebhola nangokuqeqesha kwiingcali.
UMatikinca ngumphathi kwiSekhukhune United edlala kwiPSL - kodwa wathathela kuye uxanduva lokuququzelela itumente egqamisa italente yabadlali bebhola ekhatywayo abaneminyaka engaphantsi kweshumi elinesixhenxe nabaqeqeshi. Ngenxa yokufumaneka nzima kwezifundo kwafuna uqeqesho, yena wabona ukuba makasondeze iingcali kufutshane ukuze abaqeqeshi bakwazi ukufundiswa ngeendlela ezichanekileyo ezisetyenziswa ebholeni ekhatywayo, ngakumbi kwicala lokuvelisa abadlali abatsha.
Bonke abaqeqeshi bafumene izatikiketi zabo kulo nyaka. Khange kuphelele apho, uMatikinca ubadibanise nabaqeqeshi abaziwayo kwiPSL abaquka uManqoba Mngqithi, Arthur Zwane noLehlohono Seema ngelizama ukubaqinisa kwikhondo labo elitsha abalikhethileyo.
Phakathi kwabantu abafumene ulwazi nezatifiketi nguHozeya Jubase oneminyaka eqeqesha iqela lakhe lamantombazana ekuthiwa yiJubase Youth Academy, eMthatha. "Ndifunde lukhulu ngoba bendiqeqesha nje ngaphandle kolwazi oluphangaleleyo. Ndiza kungena kwisigaba esilandelayo kulo nyaka ngoba ndakhuthazeka kakhulu. Ukhona ngoku umahluko noba ndibukele ibhola ethivini ngoba saqondiswa," utshilo uJubase.
Naye uYandisa Mbutye, ongumncedisi kwiMightyEagles FC edlala kwiABC Motsepe League, uthi ulwazi awalifumanayo lenza umahluko omkhulu ebomini bakhe. "Izifundo zazigxile kakhulu kuqeqesho lwabantwana abancinane. Safunda indlela yokuphatha abantwana abaselula ngeminyaka, indlela yokubaqeqesha nendlela abacinga ngayo.
"Ndingatsho ukuba kunyanzelekile befundile abantu abafuna ukubangaqeqeshi ngoba ufumana ulwazi olupheleleyo. Endakufundayo kuxhanyulwa liqela endikulo ngoku," utshilo uMbutye ozimisele ukungena kwiCAF C Coaching Lisence.
Related Topics: