USeema uthi iSekhukhune igxeleshe indawo yesithathu kwiBetway Premiership
Ngokutsho komqeqeshi weSekhukhune United, ukhuphiswano lwendebe yeBetway Premiership liphakathi kwamaqela amabini angentla kweqela lakhe. ULehlohonolo Seema uvakalise izimvo zakhe emva kokuba iSekhukhune United ibethe iChippa United ngegowuli elinye eqandeni emdlalweni weBetway Premiership obubanjelwe eBuffalo City Stadium ngempelaveki egqithileyo.
Igowuli elinike iSekhukhune United amanqaku amathathu lifakwe nguShaune Mogaila kwisigaba sokuqala somdlalo. Ngoku iSekhukhune iyibethelele indawo yayo kumaqela aphala phambili kwiBetway Premiership kule sizini eqhubekayo - kodwa nangona kunjalo, uSeema uthi iqela lakhe alinalo ithuba lokufumana indebe ngoba iMamelodi Sundowns ne'Orlando Pirates zihambe kakhulu.
Ihleli kwindawo yesithathu iSekhukhune United emva kokuqokelela amanqaku akumashumi amathathu ananye emidlalweni elishumi elinesibhozo eyidlaleliyo kule sizini eqhubekayo. Uthe iqela lakhe ligxeleshe indawo yesithathu xa kuphela isizini eqhubekayo.
"Amaqela amabini aphezulu aqokelele amanqaku oneleyo. Umsantsa Phakathi kwethu neSundowns lishumi elinesixhenxe lamanqaku. Sijongana nomdlalo omnye ngexesha ngoba injongo yethu siyiSekhukhune kukwenza bhetele kunesizini egqithileyo.
“Yimidlalo elishumi eshiyekileyo ngoku. Kunzima ngoba amaqela alwela iindawo ezibhetele - kodwa ke isemininzi imidlalo eseza kudlalwa," utshilo uSeema emva kokuba iqela lakhe liphumelele umdlalo obalulekileyo eBuffalo City Stadium. Isekhona indebe esisekuyo. Kusekho amanqanaba ekufuneka sidlule kuwo nakuyo.
“Sijongana nomdlalo ubemnye ngexesha ngoba sifuna ukwenza umsebenzi obhetele kunesizini egqithileyo. Kwisizini yokuqala sayivala kwindawo yeshumi elinanye, elandelayo kwindawo yesixhenxe, kwephelileyo kwindawo yesine," utshilo uSeema emva komdlalo ebuseMonti. ISekhukhune iza kwamkela iSundowns emdlalweni weBetway Premiership ekulindeke ukuba utake iintlantsi ngoLwesithathu wale veki.