UPrudence Sekgodiso ugcobile emva kokufumana iimbasa ezimbini

Imbaleki eyaziwayo, uPrudence Sekgodiso, igoduke incume olukabhulankethe emva kokuba ifumene iimbasa ezibalulekileyo ngempelaveki egqithileyo. Oku kwenzeke emva kokuba uSekgodiso efumene iwonga lembaleki yonyaka elinenekazi nembaleki eqaqambileyo (ASA Female Track of the year) nelona elithe lanefuthe kwcandeo lezeembalei (Personality of the year) emsithweni obumbejembeje eMontecasino, eJohannesburg, ngoMgqibelo odlulileyo.

Le mbaleki yaseLimpopo yeyona ifumene iivoti ezininzi ngaphezulu kwezo ibikhuphisana nazo. Phakathi kweembaleki uPrudence azibethileyo ngeevoti kukho iimbaleki ezaziwayo eziquka uGerda Steyn, uViwe Jingqi, Andriaan Wildschutt, uElroy Gelant, Akani Simbine, uBayanda Walaza noGlenrose Xaba.

USekgodiso yimbaleki enamandla futhi enosakhono esimangalisayo sokubaleka imigama emide. Kunyaka ophelileyo uzibonakalisile ukuba ngenene uyimbaleki esemgangathweni ophezulu ngokuqhuba kakuhle emidlalweni ye'Olimpiki ebise France noxa woyisaka ngomzuzu wokugqibela kusiyiwa entanjeni.

"Okokuqala, ndifuna ukubulela oogxa bam nakumqeqeshi wam kwiAthletics KZN. Kundichulumancisile kakhulu iwonga endilifumeneyo futhi ndiyabulela. Ndiyazingca kakhulu," utshilo uSekgodiso ethetha neentatheli emva komsitho wamawonga.

"Ukhuphiswano belunzima ngoba bendikhuphisana nezinye iimbaleki. Kuye kwanyanzeleka ukuba ndizame ukuqokelela iivoti ngokwam nakwiitshomi zam ezindincedisileyo. Ziitshomi zam eziqinisekise ukuba ndiyaphumelela," utshilo uPrudence ofumene newonga lembaleki ethe yanefuthe kwicandelo lezembaleki.