UPeter Shalulile ukhulule iSundowns isengxakini kwiChampions League namhlanje!
Ibuyela ekhaya iMamelodi Sundowns ithe qhiwu imisila phezulu emva kokuphumelela umdlalo obalulekileyo. Oku kwenzeke emva kokuba iSundowns ibuye ngasemva yabetha iAS Maniema Union ngamagowuli amabini kwelinye emdlalweni weCAF Champions League obubanjelwe eDemocratic Republic of Congo namhlanje emalanga.
Ifolosi eyaziwayo uPeter Shalulile ubethelele indawo yakhe njengomdlali othembekileyo emva kokwenza umahluko omkhulu kwimpumelelo efunyenwe yiSundowns namhlanje.
Njengokuba kuyiwe kwixesha lokuphumla iAS Maniema Union ihamba phambili ngegowuli elifakwe nguJephte Kitambala emzuzwini wamashumi amathathu anesibhozo, yena uShalulile ufike wafaka igowuli lokulinganisa kushiyeke imizuzu engaphantsi kweshumi kuphela umdlalo.
Kwixesha elongezelelweyo, iSundowns ifumene igowuli lesibini emva kokuba umdlali weAS Maniema egwaze Umkhonto ekhaya ngokunyanzelwa nguShalulile obekhangela indlela yokufumana igowuli lakhe lesibini emdlalweni.
Emva kokubethwa emdlalweni ogqithileyo, iSundowns iye emdlalweni wanamhlanje iphantsi koxinizelelo ngoba ibingaphumelelanga kogqithileyo. Nakubeni ibidlalela ebaleni engaliqhelanga - kodwa umdlalo ubuphethwe yiyo kwisigaba sokuqala.
Lo nto icace kakhulu ngoku iibhola zayo ezifike ezipalini zeManiema zilithoba kwezimbini qha ezifunyenwe yiyo. Isebenzile ke iManiema ngoba ikwazile ukusebenzisa ithuba elifumeneyo kwisigaba sokuqala. Ilwile iSundowns kwesesibini yazuza amanqaku amathathu.