UBongani Zungu uncede AmaZulu emdlalweni weBetway Premiership namhlanje
Igowuli likaBongani Zungu ekube kuphela kwalo emdlalweni lithathe AmaZulu lawabeka kwiTop 8. Oku kwenzeke emva kokuba AmaZulu ebethe iMagesi FC ngegowuli elinye eqandeni emdlalweni weBetway Premiership obubanjelwe ePeter Mokaba Stadium emalanga namhlanje.
Abaqeqeshi boSuthu bothuse abaninzi ngokuqala umdlalo nguVeli Mothwa onexesha elide engadlali ngenxa yeempazamo awazenzayo kunyaka ophelileyo. Ngethamsanqa lakhe, namhlanje uphele umdlalo kungafakwanga gowuli ezipalini zakhe.
Naye uZungu, ofike kwiqela laseThekwini phambi kokusongwa kuka2024, uqale umdlalo namhlanje ePolokwane. IMagesi ayikwazanga ukubhalisa ebhodini kwisigaba sokuqala nakubeni iyiyo ekwazileyo ukudlala umdlalo obhetele.
Enye into ekwazileyo ukuyenza, kukuvala amazibuko okuthe kwavimba iifolosi zaMaZulu amathuba okufumana amagowuli emdlalweni. Isigaba sokuqala simnike ithemba umqeqeshi ofikayo, u-Owen Da Gama, ozama ukuzinzisa iqela emva kokuhamba kukaClinton Larsen.
AmaZulu anyuse igiya kwisigaba sesibini. Emzuzwini wamashumi amahlanu anesithathu, uBongani Zungu ubhakuzelise umnatha okokuqala kwiqela lakhe elitsha. Amandla edlale ngawo isigaba sokuqala iMagesi FC khange abonakale kwisigaba sesibini.
Lo nto inike Amandla AmaZulu aye ePolokwane enxanelwe ukuphumelela. Ukubethwa kwayo iMagesi kuyigcina ezantsi kwiBetway Premiership. Kanti wona AmaZulu afumene ufunqu aza kuwakhuthaza ngakumbi emidlalweni yawo elandelayo.