Ibethwe ngoswazi layo iChippa United namhlanje eMonti!
Iguqiswe phantsi kabuhlungu iChippa United emva ngegowuli elinye eqandeni yiCape Town City emdlalweni weBetway Premiership obubanjelwe eBuffalo City Stadium namhlanje ngorhatya. Okuthe konzakalisa iintliziyo zabalandeli kukuba iChippa ibethwe ngegowuli elifakwe nguKayden Frances obekade edlalela yona kwisizini egqithileyo.
Inyukele phezulwana yona iCape Town City edlale ngcono emdlalweni wanamhlanje. Kwisigaba sokuqala, iphantse yafumana igowuli iCape Town City emzuzwini weshumi elinesine. Oku kwenzeke emva kwebhola entle edlalwe nguSoukouna Amadou noHasshim Domingo endaweni eyingozi.
Nangona kube njalo, yiChippa United ihlasele ngamandla yade yafumana iikona eziliqela - kodwa engakwazanga ukuzisebenzisa. Ithuba elicacileyo kwicala layo iChippa United livele ngoSinoxolo Kwayiba ongakwazanga ukubetha uDarren Keet obethe qwa ezipalini zakhe.
Kuyiwe kwixesha lokuphumla iliqanda macala. Ekuqaleni kwesigaba sesibini somdlalo, iCape Town City ingene yawulawula umdlalo ngendlela eyifunayo - kodwa yaphosa ithuba elihle lokubhalisa ebhodini. Omabini amaqela ahlaselene kwisigaba sesibini efuna igowuli.
UKayden Frances ufake igowuli emzuzwini wamashumi asibhozo ananye emva kokushiya amadoda ezizigede emva kwakhe. UStanley Nwabali khange akwazi ukuyinqanda ibhola ekhatywe ngobuchule. Igowuli livela emva komzamo omhle owenziwe nguDarwin Gonzalez.
Ukufakwa kwegowuli kwenze izinto zanzima kwiChippa United ebekubonakala ukuba idlalela ukungabethwa kwisigaba sesibini somdlalo. Nakubeni beseskunzima - kodwa izamile ukusukela izama ukufumana igowuli lokulinganisa. ICape Town City ifumene amanqaku amathathu ayithathe ayibeka endaweni entle kakhulu.