Igalelekile iHome of Legends Cup ejongwe ngamehl' abomvu ngabaninzi!
Abantu abaninzi baza kujongisa imibombo yabo eGqeberha - apho kukho ingxikela yetumente yebhola ekhatywayo eza kube ibanjelwe eNelson Mandela Bay Stadium. Ngamaqela amane adlala kwiPremier Soccer League amenyiweyo ukuze athathe inxaxheba kwitumente yokuqala ekuthiwa yiHome of Legends Cup.
Loo maqela yiChippa United, iKaizer Chiefs, iMamelodi Sundowns neGolden Arrows. Ngomhla ebekuphehlelwa ngawo iHome of Legends Cup, iinkokeli zikamasipala zathembisa ngetumente eza kushiya iinkumbulo ezingalibalekiyo ezingqondweni zabantu. Noxa itumente iqhubela phambili - kodwa bekukhe kwakho amagingxi-gingxi othusayo.
Kwiveki ephelileyo iChippa United yothuse umzi ngethuba ikhupha ingxelo ethi ikreqile kwiHome of Legends Cup ngenxa yomrhumo enunuswe ngawo obungalingani nowamanye amaqela. Kodwa iye yalungiswa lo nto yabuyela ngaphakathi endaweni ebiseyithathwe yiCape Town City. Iingcango ziza kuvulwa ngentseni yangoMgqibelo.
Umdlalo oza kugabula izigcawu uphakathi kweChiefs neGolden Arrows ngentsimbi yeshumi kusasa. Owesibini uphakathi kweChippa neSundowns ngentsimbi yokuqala emini emaqanda. Akukacaci nokuba iintshatsheli zakufumana imali engakanani ngoba abaququzeleli bazinkonyile iinkcukaca.
Kodwa njengokuba amaqela esathe nqumama ngenxa yemidlalo yeFifa, amaqela angavavanya abadlali abaninzi abangadlaliswayo kwiHome of Leagends Cup. Iza kuncedeka ngakumbi yona iSundowns ejongwe kukudlala umdlalo obalulekileyo weCarling Cup kwiveki ezayo eBloemfontein. Umphathi weChiefs, uJessica Motaung, uyichaze itumente njengento ebalulekileyo kakhulu watsho ecela inkxaso yabalandeli.
"Inkxaso esiyifumeneyo kule sizini ingumangaliso. Sicela abalandeli bethu baxhase iqela labo njengesiqhelo. Ubukho babo buza kwenza umahluko omkhulu ebaleni. Siyiqhwabela izandla iNelson Mandela Bay Metro ngokuza nombono omhle okhulisa ibhola ekhatywayo," utshilo uMotaung. Amakhosi anganika abadlali abatsha ithuba lokudlala emva kokuhlazwa yiSundowns emdlalweni weCarling Cup kutshanje eFNB Stadium.