Iapile lokuqala lavunwa ngo1662 eMzantsi Afrika.
Image: iStock
Ngomhla weshumi elinesixhenxe kuTshazimpunzi ngo1662, kwavunwa iapile lokuqala nguJan van Riebeeck kwincam yeKapa okokuqala ezimbalini.
Oku kwenze ukuba olu suku lwanamhlanje lube yimbali ebalulekileyo kumafama wee'apile eMzantsi Afrika, nanjengoko iapile lidlala indima ebalulekileyo kuqoqosho nakwintlalo.
Le mbali ithi uVan Riebeeck wathatha ama-apile amabini kuphela wohlobo lweWijnappel kumthi owawuqala ukuthwala ama-apile ngaloo nyaka. Ngenxa yoku, uMzantsi Afrika namhlanje lelinye lamazwe ahamba phambili kwihlabathi ngokuthumela ama-apile kwiindawo ezahlukeneyo zehlabathi.
UMzantsi Afrika kulindeleke ukuba uthumele umthwalo wee'apile eliqikelelwa kwiikhathuni ezingaphezu kwamashumi amahlanu ezigidi ezibunzima bukwishumi elinesibini nesiqingatha seekhilogram.
Ngokwengxelo ka2024, amazwe aseMpuma naseAsia ngawona ahamba phambili ukuthenga iapile loMzantsi Afrika ngomyinge wamashumi amathathu ekhulwini eepesenti. Amazwe aseAfrika wona athenga iapile leli ngomyinge wamashumi amabini ekhulwini eepesenti.
Amanye amazwe ehlabathi athenga iapile leli aquka iChina, Melika, Canada, Indiya neMexico. Ilizwe laseThailand lingenelele kutshanje nalo ukuba lelinye lamazwe aphambili ukuthenga iapile loMzantsi Afrika.
INtshona Koloni yeyona ivelisa iapile elininzi kweli loMzantsi Afrika ngenxa yeefama zengingqi yaseLangkloof Valley, iMpuma Koloni, Limpopo neFreyistata nazo zikhona kwimveliso yeapile.
UJeanne Fourie ngumphathi wenkampani yakwaTru-Cape ehamba phambili ngokuvelisa iziqhamo kweli. "Elona apile lidala eliveliswa kweli yiGranny Smith eyathi yaqala ukutyalwa kweli ngonyaka ka1919 ivela kwilizwe laseAustralia," kutsho uFourie.
IGolden Delicious neRoyal Gala ngawona ma'apile ahamba phambili ngokuthengwa kweli loMzantsi Afrika. Sithi halala kwi'apile ngokubhiyozela iminyaka engamakhulu amathathu anesithathu eMzantsi Afrika.
Iapile liyinxalenye yezidlo zabantu beli imihla ngemihla logama likwadlala indima entle neyaziwayo kwezoqoqosho ngokudala amathuba emisebenzi.