Amafama ombona aseFreyistata axakene neentethe.
Image: Whitehavengirl/iStock
Sele kuyinto eqhelekileyo yokuba amafama ombona nezinye izityalo azibhaqe ehlaselwa lutshaba olufana nezi ntethe ezitya umbona ukusuka egqabini ukuya esikhwebini.
Ingxelo yeSebe lezolimo kwela phondo ithi le ntethe ihamba ngokungxama kwaye ihlasela indawo enkulu ngexesha elincinci. Ngaphandle kokuba zitshabalalisa umbona, ezi ntethe zikwahlasela ingca nezinye izinto eziluhlaza ezidibana nazo endleleni.
IMpuma Koloni ikhe yadibana nale ngxaki ngonyaka ka2023 nalapho amafama aseAmathole athi alahlekelwa ngumbona omninzi ngenxa yale ntethe. Kuthiwa okona kuyingxaki kukuba izala ngamandla kwaye amantshontsho ayakhawuleza ukukhula aqalise ukwenza umonakalo nawo.
Ziziganeko ezingamashumi amathathu ananye esele zichaziwe kwela phondo kwiintsuku nje ezimbini zokuqatshelwa kwale ntethe eFreyistata.
UMasipala waseLetsemeng kwiidolophu eziquka iJacobsdal, Luckhoff kwakunye neKoffiefontein sele usengxakini ngenxa yale ntethe.
Kuthiwa akakaziwa unobangela wokuhlasela kwale ntethe ngolu hlobo, kwela phondo amagosa ezolimo asenza uphando ezama ukuqiniseka ukuba kwenzeke ntoni.
Amafama wemfuyo ayacela ukuba anqande imfuyo yawo ukuba ingangeni kumadlelo asele ehlaselwe yile ntethe.
Iindawo ezabelana ngemida nephondo laseFreyistata ezifana neMpuma Koloni zingahle zibone zihlaselwa yile ntethe kuba ihamba ngokukhawuleza okukhulu, itsho ingxelo.