Ibuyela eGqeberha inkomfa yamafama weorenji
Umbutho okhokele imveliso yeeorenji kweli, iCitrus Growers’ Association, uqinisekise ukuba ngenene iza kubuyela eGqeberha inkomfa yabo kulo nyaka ka2025.
ICitrus Growers’ Association ikhuthaza, ikhulisa ikwaxhobisa amafama avelisa iimveliso zeorenji kweli nakumazwe angabamelwane boMzantsi Afrika.
UJustin Chadwick nguMphathi kwiCitrus Growers’ Association kuzwelonke, ucacisa okuzakwenzeka kulo nyaka.
“Inkomfa yethu ngenene ibuyela eGqeberha eBoardwalk, inkomfa ingomhla weshumi elinanye ukuya kumhla weshumi elinesithathu kwinyanga yoKwindla,” kucacisa uChadwick.
Kulindeleke ukuba le nkomfa kulo nyaka iqhubeke nokunikisa ngeembasa kumafama weorenji azibaluleyo ngomsebenzi wawo wokuvelisa iiorenji.
“UAnya Jaworski ngomnye wezithethi eziphambili eziza kuthatha iqonga zithethe namafama weorenji, sinaye noKuhle Nohamba, kwakunye noNhlanhla Mathaba abaza kuba zizithethi nabo,” kutsho uChadwick.
UMzantsi Afrika uhlala uhamba phambili eAfrika nakwihlabathi ngokuvelisa iimveliso ezahlukeneyo zeorenji.
Ilizwe laseChina lelinye lamazwe ahamba phambili ekuthengeni iimveliso zeorenji eMzantsi Afrika. “UAnya Jaworski wenze icebo lokulandela umzila ohanjwa yilamuni ukusuka kumfama ukuya kumazwe ahlukeneyo ehlabathi ngokusebenzisa ubuxhakaxhaka bala maxesha,” kutsho uChadiwick.
Kunyaka ophelileyo, le nkomfa ibizinyaswe nguMphathiswa weSebe lezolimo nophuhliso lwamaphandle owatshintshwayo kwesi sikhundla uThoko Didiza.
Encokola ne-Entsimini malunga nemveliso yamaorenji eMzantsi Afrika nakwihlabathi uDidiza wathi: “Sinqwenela ukubona amafama amnyama ekhula nawo kwintengiso yeorenji afikelele kwinqanaba lehlabathi, ukuze akwazi ukufumana imali ngeorenji njengamanye amafama,” watsho uDidiza.
Kukho ukukhula okuncomekayo kwenani lamafama amnyama angenelela ukuthengisa iorenji ngokuba ngabanikazi beefama zeeorenji.
Iinkqubo zikaRhulumente zokunika amafama amnyama ithuba lokuba ngabanikazi bomhlaba, ngokukodwa iifama, kuzala amaduna namathokazi.