ElaseTopiya lihamba phambili ngeenkomo eAfrika
Ngokophando olwenziwe ngonyaka ka2022, ilizwe laseTopiya lihamba phambili kwilizwekazi laseAfrika ngelona nani liphezulu leenkomo eAfrika.
Iinkomo ezivelisa ubisi zezona zininzi kunezinye iindidi zeenkomo ezifuywe ngamafama aseTopiya.
Ngaphandle kwembali etyebileyo yela lizwe, likwahamba phambili ngokufuya kweendidi ezahlukeneyo zemfuyo eziquka iigusha, iibhokhwe kwakunye neenkomo.
Nangona kunjalo, ela lizwe linamafama asasebenzisa iindlela zakudala zokwenza izinto eziquka ukondla imfuyo nezinye. Ngamashumi asixhenxe ezigidi iinkomo ezifuywe ngamafama elizwe laseTopiya, logama iinkamela zikwizigidi ezisibhozo kuphela.
Ela lizwe liqhayisa ngamadlelo avuleleke ngokucacileyo kwimfuyo apho kungekho ngenelelo lomalusi koko imfuyo iyazidakasela.
Ilizwe laseChad lihleli kwindawo yesibini ngeenkomo ezikwizigidi ezingamashumi amathathu, kuze kulandele ilizwe laseSudan. Ngonyaka ka2022 ilizwekazi laseAfrika belineenkomo ezikumakhulu amathathu namashumi asibhozo ananye eenkomo.
Kwangalo nyaka mnye iinkomo kwihlabathi bezikwibhiliyoni enye, le ngxelo ithi inani leenkomo kwihlabathi belinyuke ngesigidi esinye xa sithelekiswa nonyaka ongaphambili u2021.
UChristo Baron ungumfama kwelaseJamani, uthi olu lwazi lubaluleke kakhulu kumafama amancinci namakhulu.
”Ulwazi olunje luxhobisa umfama kumanqanaba ahlukeneyo ukuze akwazi ukuthatha izigqibo ezizizo ngeshishini lakhe lokufuya, kunceda ngamandla ukuba umfama akwazi ukulawula ngendlela eyiyo ishishinini lokufuya,” kutsho uBaron.
Ukugcinwa kwamanani neenkcukacha kunceda ukuba umfama akwazi ukuqaphela imvelaphi yeengxaki zakhe kwimfuyo yakhe.
Ngamakhulu ezigidi abantu abaphila ngokutya inyama yenkomo, logama abanye bexhomekeka kwiimveliso eziveliswa kwimpilo yeenkomo. Ilizwe loMzantsi Afrika lihleli kwindawo yeshumi elinanye ngeenkomo ezilishumi elinesibini sezigidi kuphela.