Abasebenzi kwifama yecuba eZimbabwe.
Ngamafama angamashumi amathathu amawaka aseZimbabwe ekulindeleke ukuba axhamle kuncedo lwemali engamashumi alithoba ezigidi zeerandi esuka kurhulumente waseJapan.
La ngamafama akwizithili ezihlanu ezahlukeneyo eZimbabwe nathwaxwa kanobom ziimeko zokuguquguquka kwemozulu.
Ngokwengxelo yombutho ozimeleyo iAfrica Watch, olu ncedo lujoliswe ukulwa iingxaki eziphazamisa ukuveliswa kokutya eZimbabwe.
Olu ncedo luza kuqhuba isithuba seminyaka emithathu lijoliswe ngokukodwa kwiinzame zokuveliswa kwamanzi, ukuqiniswa kwezolimo nokukhuthaza ukuthengiswa kweemveliso zolimo.
Unozakuzaku welizwe laseJapan eZimbabwe, uShinichi Yamanaka, uthembisa ukuba baza kusebenzisana namafama aseZimbabwe ukuqinisekisa imveliso yokutya.
Ngenxa yendlala eninzi eZimbabwe, urhulumente wela lizwe wathatha isigqibo sokuba kuza kuxhelwa iindlovu ezingaphezu kwamakhulu amabini kondliwe uluntu lwaseZimbabwe.
“Phantsi kwale nkqubo silindele ukuba amafama amancinci aseZimbabwe ancediswe ukukhulisa umsebenzi wawo, asebenzisane nenkampani yaseJapan kweli i-Itochu Corporation,” utsho uYamanaka.
Urhulumente welizwe laseJapan ukwagalele imali esisigidi seerandi ukuze kwakhiwe iindawo zokugcina isivuno samafama kwisithili saseMwenezi.
“Sijonge ukuwancedisa ngamandla amafama aseZimbabwe ukuba avelise uhlobo lwembotyi ekuthiwa yisesame, iza kuba kokokuqala ukuba ityalwe kweli laseZimbabwe,” kucacisa uYamanaka.
Urhulumente weZimbabwe African National Union - Patriotic Front (ZANU-PF) walifumana ilizwe laseZimbabwe livelisa ukutya okwaneleyo, likwahamba phambili kwimveliso eziquka ingqolowa, umbona kwakunye necuba.