UPeter de Villiers uzimanye noMkhonto WeSizwe
Owayesakuba ngumqeqeshi wamaBhokobhoko, uPeter de Villiers, owayeyinkedama yezopolitiko emva kokugxothwa yiGood Party, ekugqibeleni ufumene ikhaya elitsha ngokuzimanya nombutho kaJacob Zuma woMkhonto weSizwe Party (MK Party).
Le nzalelwane yasePaarl eNtshona Koloni yamkelwe ngokusesikweni kumsitho obubanjelwe kwifama kaSekela Mongameli weMK Party kunye nenkokeli yalo mbutho ePalamente, uGqirha John Hlophe, ePaarl.
Kumakhasi onxibelelwano, iMK Party eNtshona Koloni ibhale umyalezo owamkela uDe Villiers. “Umbutho woMkhonto weSizwe eNtshona Koloni wamkele owayesakuba ngumqeqeshi weSpringbok, uPeter de Villiers, kumbutho wawo, nto leyo ephawula isiganeko esibalulekileyo kulo mbutho.
“Lo msitho ubukhokelwa nguSekela Mongameli wombutho kunye nenkokeli yawo ePalamente, uGqirha JM Hlophe, obekhokele inkqubo yokuququzelela neengxoxo eziqaqambisa igalelo elincomekayo likaDe Villiers kumbhoxo waseMzantsi Afrika kunye nombono wakhe ngekamva.
“Oku kubonisa ukuzinikela kumanyano nokuxhobisa embuthweni, nanjengoko bezama ukusebenzisa amava kaDe Villiers nobuchule bobunkokeli ukuqhubela phambili iinjongo zabo zokumanyanisa abantu bephondo ngokubanzi,” itshilo ingxelo.
UDe Villiers wagxothwa yiGood Party kaPatricia de Lille kweyoKwindla kunyaka ophelileyo emva kwezityholo zokuziphatha kakubi ngokwesondo.
“IGood ngumbutho okhokelwa ngabasetyhini, onomgaqo-siseko oqulethe uluhlu lweenqobo ezisemgangathweni ekufuneka onke amalungu awulandele, nokuba zithini na izikhundla zawo.
“Umgaqo-siseko weGood usebenza ngokubanzi nangokungagungqiyo ngamalungelo esini kunye nokuziphatha kakubi ngokwesondo. Lo mbutho uyazingca ngerekhodi lawo lokumela amalungelo alinganayo amanina namantombazana, nokulwa ubundlobongela obusekelwe kwisini eMzantsi Afrika,” watsho lo mbutho ngelo xesha.