Umdlali uzise emapoliseni emva kwengozi esube ubomi bomntana oneminyaka eyi9
Iingxelo zamajelo eendaba zithi uShaune Mogaila uzise emapoliseni emva kokubandakanyeka engozini ngentseni yanamhlanje. Kuthiwa lo mdlali weSekhukhune United uye wabaleka emva kokuba imoto ebiqhutywa nguye ibandakanyeke engozini esube umphefumlo womntwana oyintombazana oneminyaka elithoba kwilokishi yaseTembisa.
Isithethi samapolisa aseKurhuleni Metro sixelele iSowetan ukuba uMogaila, ofumene ukugruzuka okungephi, uzise emapoliseni eRabie Ridge emva kwemini namhlanje. Kuthiwa emotweni kufunyenwe intsangu notywala ekukrokrelwa ukuba bobakhe uMogaila ongumdlali webhola ekhatywayo kwiPremier Soccer League.
Umama obekwenye imoto ubalekiselwe esibhedlele emva kokufumana ukonzakala kakubi. Ingxelo ithi umama owonzakeleyo ebesisa umntwana wakhe esikolweni ngethuba imoto yakhe eluhlobo lweHyndai Grand i10 ingquzulana neBMW ebiqhutywa nguMogaila. Ngokwengxelo yeSowetan, amapolisa afumene iibhotile zotywala, intsangu nomgubo ekucingelwa ukuba ziziyobisi emotweni kaMogaila.