[IVIDIYO] Umqhubi weloli yakwaSasko nogxa wakhe badutyulwe babhubha - kufunwa abenzi bobubi!
Kubhubhe abantu ababini kwaze kwalimala omnye ngethuba amadoda angaziwayo axhobileyo ehlasela iloli yezonka yakwaSasko eDelft, eKapa kwiveki ephelileyo ngoLwesine.
La madoda ebehambisa izonka kule ndawo ekuseni ngoLwesine ngethuba kusenzeka oku.
Ividiyo yesi siganeko ijikeleza kumakhasi onxibelelwano kwaye ibonisa la madoda mathathu ebala imali ngaphakathi kule loli. Emva koko kwafika amadoda axhobileyo angaziwayo abaphanga imali yabo phambi kokuba adubule izihlandlo ezininzi.
Amadoda amabini aquka umqhubi abhubhele kwindawo yexhwayelo logama omnye ebalekiselwe esibhedlele kwaye ufumana unyango.
Kutyholwa ukuba esi siganeko sinxulumene nentlawulo yokhuseleko, iprotection fee ngelasemzini, edla ngokufunwa ngamaqela olwaphulo mthetho.
Ngokweengxelo, kutyholwa ukuba iiloli zakwaSasko ezisebenza eDelft azinabo oonogada abazikhaphayo xa zihambisa izonka.
Omnye umfanekiso womrhanelwa othathwe kwividiyo uyajikeleza kwaye amapolisa acela uncedo kuluntu ukuze amfumane.
Kucelwa nabani na onolwazi ngesi siganeko atsalele iCrime Stop ku-08600 1011.
Bukela le vidiyo