IKnorr irhoxise iBrown Onion Gravy kuzwelonke
IKnorr irhoxise ezinye zeemveliso zayo emva kokufunyaniswa ukuba ezinye iipakethi zeKnorr Brown Onion Gravy ziqulethe ngempazamo izithako zeKnorr Professional Brown Sauce Base.
Ingxelo ithi ngenxa yale mpazamo, isitokhwe esichaphazelekayo siqulethe ubisi lwenkomo kunye nesoya engachazwanga kuluhlu lwezithako kwipakethi yeKnorr Brown Onion Gravy. Abanye abantu abalwani nobisi lwenkomo kunye nesoya.
Okhokele kwiZondlo kwaUnilever kumazantsi eAfrika, uJanine Van Rooyen, uthi bakubona impazamo benza ngokukhawuleza.
“Njengenkampani ekholelwa ukuba ukutya okulungileyo kubalulekile, impilo kunye nokuphila kakuhle kwabathengi bethu kubaluleke kakhulu. Sathi sakufumanisa oku, ngoko nangoko sathabatha imveliso saza senza uhlengahlengiso oluyimfuneko ukuze silungise le meko.
“Sizibophelele ekuqinisekiseni imigangatho ephezulu kunye nokhuseleko lweemveliso zethu ezithandwa nezithenjwe ngabemi boMzantsi Afrika.
“Sizisola kakhulu ngayo nayiphi na ingxaki enokuthi ibangele. Enkosi ngokuqonda kwenu nenkxaso eqhubekayo,” utshilo uVan Rooyen.
IKnorr icela ukuba abathengi abathenge naziphi na iipakethi zeKnorr Brown Onion Gravy eziphawulwe BB 11 DEC 2025 KM 4163 E14A okanye BB 12 DEC 2025 KM 4164 E14A bangazityi iimveliso kwaye bazibuyisele kwivenkile ekufutshane ukuze babuyiselwe imali okanye bazise abakwaUnilever SA ngokusebenzisa iConsumer Careline yabo 0860 331 441 okanye ikhasi likaWhatsApp leConsumer Engagement Centre +27 67 429 7040.