Umfoti uAyanda Ndamane. Umfanekiso: Uthunyelwe
Umfoti weAfrican News Agency uAyanda Jongi Ndamane uphumelele imbasa yakwaStandard Bank Sikuvile enikwa oompondo zihlanjiwe boonondaba nabafoti.
UNdamane uphumelele le mbasa ejijisana nabanye abafoti abaphuma kumaphephandaba ohlukeneyo kweli. Ezi mbasa kudala ziqhubeka, zikhuthaza ababhali beendaba nabafoti ngokunjalo.
Kulo nyaka, ezi mbasa ziququzelelwe liqumrhu labahleli kweli iSouth African National Editors’ Forum.
UNdamane uphumelele le mbasa ngenxa yomfanekiso wakhe owawubonisa umzabalazo wabo baxhasa ilizwe lasePalestina kwidabi eliphakathi koSirayeli nePalestina.
Eli nqaku lakhutshwa kwiphephandaba iCape Times ngethuba belishushu idabi lePalestina neSirayeli. Lo mfanekiso ukhutshwe ekupheleni konyaka ophelileyo ngethuba eli dabi lalamazwe belikwiqondo eliphezulu.
Iijaji ebezijonge le mifanekiso zivumelene ukuba lo mfanekiso ubonisa ngaphandle kwamathandabuzo ubugorha babafoti kweli.
“Ndikhuliswe ngutata omkhulu wam obelichule lokubalisa ibali, akazange aye esikolweni kodwa ebenobuqili bokubalisa ibali,” kutsho uNdamane.
UNdamane yinzelelwane yaseCacadu kuTsembeyi phantsi kwezantaba zakwaKraqa, kwingingqi ezele imbali etyebe ngokwenene. Kwindawo azalwa kuyo kuphume izangxa zolwimi lesiXhosa ezifana noNjingalwazi Zanemvula Zothwana, Mlawu Tyatyeka kwakunye nongasekhoyo uMfundisi uVuyani Vivian Mthini.
“Ukukhulela ezilalini kuthetha ukuba ukhula kwintlalo engenamabonakude, nomathotholo namaphephandaba, kodwa utata omkhulu ebekwazi ukubalisa amabali eendawo ezimngqongileyo nembali yelizwe ngokubanzi,” kutsho uNdamane.
Ngaphandle kwale mbasa, uNdamane udlale indima eyaziwayo kuphuhliso lolutsha kwiilali zakuTsembeyi.