Abarhanelwa ngokurhafisa nokuxhwila abantu badibene neembila zithutha kwisithili saseChris Hani
AmaPolisa aseMpuma Koloni adubule abarhanelwa ngeCawe ephelileyo eCofimvaba.
Image: File image
Iphulo lamapolisa lokusiphula neengcambu ulwaphulomthetho lisaqhubela phambili eMpuma Koloni. Ahlatyaniselwe ngembumbulu awunabela uqaqaqa amadoda amabini izolo kwindlela ephakathi kweKomani neCofimvaba emalanga ngeCawe edlulileyo.
Oku kuxelwe sisithethi samapolisa ephondweni leMpuma Koloni, uBrigadiya Nobuntu Gantana. Kuthiwa amadoda amabini, anethuba elide ezingelwa ngamaPolisa, atshintshiselene ngeembumbulu nebutho lamaPolisa elikhethekileyo (Tactical Response Team) emalanga ngeCawe edlulileyo ehamba ngemoto yakwaToyota.
La madoda eberhanelwa ngorhafisa abantu ngendlela engekhomthethweni nokuxhwilwa abantu kwisithili saseChris Hani. "Imoto ebihamba abarhanelwa yoyananyisw nesiganeko sokuxhwilwa kommi waseChina nomkhwa ombi wokurhafisa abantu kwisithili saseChris Hani.
"AmaPolisa ayimise imoto ihama kwindlela ekuthiwa nguR61 kufuphi neHafton Fam phakathi kweKomani neCofimvaba. Omnye wabarhanelwa udubule amaPolisa," utshilo uGantana kwingxelo ebhaliweyo ekhutshwe yinkonzo yesipolisa eMpuma Koloni. Sekulithuba elide uluntu luswantsuliswa zizaphulimthetho ezibabhatalisa imali engaziwayo ukuba yeyantoni.
"Ngokomgaqo wokusebenza wamaPolisa, amalungu weTRT aye anyanzeleka ukuba azikhusele engozini ngokuphindisa. Bobabini abarhanelwa bonzakele kakubi," itshilo ingxelo yamaPolisa. UGantile uthe isehlo sixeliwe kwiqumrhu eliphanda iziganeko eziphanda amapolisa (Independent Police Investigative Directorate).
Kwinyanga ephelileyo, amaPolisa enze umsebenzi ofanayo kubarhanelwa ababequka ekwakusithiwa nguMathongo Menye kwilali yakwaDosi, eMthatha. Naye wayerhanelwa ngokubandakanyeka kwizenzo zolwaphulomthetho. Omnye owanabela uqaqaqa ngu-Olwethu Nkanyisa kudubulwano elenzeka eNgcobo.