Ukuqokelela iR1.4 billion kubonisa uzinzo eKSD Municipality
iKing Sabata Dalindyebo Municipality ikwimeko ezinzileyo kwicala lezimali.
Image: I'solezwe lesiXhosa
Njengokuba kuphela ixesha lezigqeba ezilawula oomasipala phambi kolonyulo, isigqeba saseKing Sabata Dalindyebo Municipality siza kuphuma sishiya ezinto ezimbalwa ezincumisayo.
Phakathi kwezinto iKSD Municipality ephucuke kuzo luphicotho leencwadi olenziwa nguMphicothizincwadi woluNtu nendlela encumisayo eqokelela ngayo imali esuka kwizinto eziquka umbane, inkonzo yelindle, kuqokelelo lenkukuma nakwiilayesenisi zeemoto.
Oku kudizwe ngumphathi kamasipala, uMnu. Ngamela Pakade, koonondaba entlanganisweni ebiseGompo - apho bekuqwetywa khona amaqhinga okuphucula iinkonzo zoluntu. Ingxelo yomphicothizincwadi efunyenwe yiKSD Municipality iminyaka ilandelelana, phantsi kwesigqeba esiphelelwa lixesha kulo nyaka, ichazwe njengento ezalwe sisikhokelo esibeke phambili ukusebenza kakuhle kukamasipala.
Njengokuba oomasipala abaninzi bentywila kwiingxaki zemali, uPakade uthe iKSD Municipality iphakathi koomasipala abaphambili eMzantsi Afrika kwicala lokuqokelela imali engena engxoweni. Uthe zimbalwa kakhulu iindawo ezingazibhataliyo iinkonzo zikamasipala ngoku kwaye lo nto imnike amandla umasipala kwicala lezimali.
"Sifumana imali ngokuhlawulisa amashishini eMthatha, sifumane ngokuthengisa umbane, sifumane kwirhafu yeemoto nasekuqokeleleni kwinkonzo yelindle neyenkukuma. Kwicala leemoto sisebenzisa nesebe leZothutho esohlulelana nalo imali yeelasenisi," utshilo umphathi waseKSD Municipality ethetha neli phephandaba.
"Siyaxhaswa nanguRhulumente kazwelonke - kodwa manditsho ukuba asixhomekekanga kuye kakhulu. Imali eninzi uyazenzela umasipala ngokwakhe. Kulo nyakamali, iR1.4 billion sizenzele ngokwethu singumasipala.
"Ngumyinge wemali oyi44% esiyifumana kuRhulumente. Siphakathi koomasipala abaphala phambili kwicala lokuzenzela imali elizweni lonke. Ndingatsho ukuba siku95% kwicala lokuqokelela imali futhi sifuna ukufika ku100%. Zisekhona iindawo ezisinika ingxaki kwicala lokubhatala iinkonzo zikamasipala.
"Yiyo lo nto sizicimela umbane iindawo zikaRhulumente namashishini angasibhataliyo," utshilo uPakade. Kwelinye icala, uSodolophu uNyaniso Nelani uthe abafuni ukuthetha kakhulu, okwabo kukwenza zonke izicwangciso abazenzileyo kulungiswe neempazamo ezenzekileyo.