URamaphosa umchaze njengomntu obelumkile uBhishoph' uJohn Bolana!

Inkokeli yelinye lamabandla amakhulu eMzantsi Afrika ichazwe njengesisele sobulumko nguMongameli Cyril Ramaphosa kule veki. Oku kuvele ngethuba uRamaphosa etyelele ikhaya likaBhishophu uJohn Bolana okhothame ngoLwesithathu weveki ephelileyo emva kwengulo emfutshane eGqeberha.

UBhishoph' uBolana uhambe emhlabeni eyinkokeli yebandla ekuthiwa yiBantu Church of Christ elasungulwa eKapa ngonyaka ka1914. Iinkokeli zeAfrican National Congress (ANC), eziquka uSihlalo wephondo uLubabalo Mabuyane, uNobhala Jikelele uFikile Mbalula - zenze utsi gxaka kwikhaya lakwaBolana ziyokugxwala emswaneni kwiintsuku ezidlulileyo.

URamaphosa uxelele iintatheli ukuba wazana noBhishophu Bolana ngeentsuku zikabhubhane ekwakuthiwa yiKhorona ebikhe yaphehluzelisa kakubi uMzantsi Afrika nehlabathi kwiminyaka embalwa edlulileyo.

"Ndimazi njengomntu obenobulumko, enomoya ophantsi ekudibaneni kwam naye ngethuba sinengxaki yeKhorona," utshilo uMongameli ethetha ngoBhishophu osweleke eneminyaka engamashumi asibhozo anesibini (82). "Kubuhlungu ukuva ukuba uBhishophu akasekho emhlabeni. Ndizise amazwi entuthuzelo kweli khaya ngoba ndihlonipha igalelo alenzileyo eluntwini laseGqeberha.

"Ngumntu onike abantu abaninzi intuthuzelo. Xa ndilapha eGqeberha, bendisiza apha kuye. Kubi ngoba silahlekelwe ngumntu obenolwazi, enemibono emihle futhi ewuxhasa umsebenzi wethu singuRhulumente.

"Ebesoloko esibuza imibuzo enzulu ngezinto esizenzayo kwaRhulumente, esinika neengcebiso ngemiba ethile. Nditshilo ke ebantwini bekhaya ukuba andizukubakho esifihlweni ngoba ndiya engqungqutheleni yeAfrican Union ekufuneka ndinike ingxelo yeG20 kuyo," utshilo uRamaphosa.

Naye uMabuyane umchaze uBhishophu njengenkokeli ebinombono futhi izibophelele kuphuhliso loluntu. "Ebeyinkokeli yeCawe ebithobekile obungasoze uyive ithetha kakhulu. Besisiza apha xa sifuna ukucetyiswa ngeANC sifuna nokuva ngendlela esenza ngayo kwaRhulumente.

"Nangamaxesha anzima, besifumana ubulumko apha kuye. EbenguTata apha kum ngoba besisondelelene. Wandothusa ngokufika ekhaya kukho umgidi wabantwana bam. Sifundile kuye futhi sakuhlala sifunda kwiimfundiso zakhe asinike esaphila," utshilo uMabuyane ethetha neentatheli kule veki.

UBhishophu uza kubekwa kwikhaya lakhe lokugqibela ngentsasa yangeCawa yale veki eGqeberha. Ingxelo ekhutshwe nguRhulumente wephondo ithe uBhishophu uza kukhatshwa ngenkonzo yaseburhulumenteni ekhethekileyo.

UMfundisi uMlungisi Bebula uchongwe njengentloko entsha yeBantu Church of Christ.